Cобиқ севиклим совчиларни айнитяпти

— Бундан уч йил олдин бир йигит билан танишиб қолдим. Аввалига дўстона гаплашиб юрдик. У менга чиройли сўзларни айтар, кўнглимни олиш учун меҳрибонлик қиларди. Унинг ширин гаплари эс-ҳушимни ўғирлади, жуда ҳам боғланиб қолдим. У ҳам менга бефарқ эмасдек эди. Аммо... Ҳозир умуман кўришмаймиз, гаплашмаймиз. Мен уни ортиқ қизиқтирмай қўйдим. Бироқ шунда ҳам тинч қўймаяпти. Совчи қўйган йигитларни «Мендан қолган қизга уйланасанми?», деб айнитади. Балки ўзи совчи жўнатмоқчидир десам, жим – жит. Тўғриси, уни тушунмаяпман. Бир тарафдан унда ҳалиям кўнглим бор. Бошқа йигитга турмушга чиқишни сира тасаввур қилолмайман. Менга маслаҳат беринг.

Динора, 21 ёш

Мутахассис – Азиза ТОШХЎЖАЕВА, психолог

— Ҳар бир инсон уни севиб, ардоқлайдиган, тушунадиган, ғамхўрлик қилувчи умр йўлдоши бўлишини ният қилади. Аксарият қизлар, севиб, севилиб турмуш қуришни исташади. Муҳаббат эса қалбларга сўроқсиз кириб келувчи, айни ўсмирлик даврида вулқондек отилиб турувчи туйғудир.

Муштарий мурожаатида аввал муҳаббат ҳақида, сўнг унинг сўниши ҳикоя қилинган. Хўш, нега шундай бўлди? Қизгина севги деб билгани аслида ҳам шундаймиди? Қуйида инсондаги гўзал туйғуларнинг сўнишига олиб келувчи омилларга тўхталамиз.

Муҳаббатни шартли равишда бир неча босқичларга бўлиш мумкин. Булар:

«Муҳаббатнинг кўзи кўр». Йигит ва қиз танишиб, учраша бошлашгач, ўзаро муносабатлар вужудга келади. Бу маҳалда улар бир-бирининг камчиликларини кўришмайди. Фақат яхши жиҳатлар, ташқи кўриниш муҳим бўлади, холос. Иккисини кучли ҳис-ҳаяжон, туйғулар бошқаради.

«Севади-севмайди...» Вақт ўтиб, йигит ва қиз муносабатида ўзаро қизиқишлар, дунёқараш, фикрлар хилма – хиллиги юзага чиқади. Доимий суҳбатлар давомида улар бир-бири ҳақида кўпроқ малумотга эга бўлади. Оила азолари билан сиртдан танишув бўлиб ўтади. Айни паллада йигит ва қиз ўз оилаларини бир – бириники билан солиштириши мумкин. «Биз бир – биримизга тўғри келмас эканмиз» дегувчилари ажралишади. Аксинча, фикрлагани эса турмуш қуради. Йигит ва қизнинг тил топишиши қийин кечса, оилалар ўртасида катта тафовут бўлса, охир – оқибат уларнинг муносабати кўпга бормайди. Ақл ва қалб жангида ақл устунлик қилади, бироқ юрак буни тан олмай азобланади.

Соғинч. Қалб мағлуб бўлгач, ҳиссиётларнинг сўниши осон бўлмайди. Ёқимли онларни соғиниш, чиройли сўзларни қўмсаш – бир сўз билан айтганда юракнинг азобланиш даври бошланади. «Муҳаббатнинг кўзи кўр» бўлгани учун қиз йигитнинг ҳаракатларини англолмайди ва «Аввал ундаймасди, яхшийди-ку», дейди.

Муносабатлар тугадими, бундан буёғига ақл билан иш кўриш лозим. Муштарийимиз ҳали ҳам йигитда кўнгли борлигини айтибди. Тўғри, юракка қарши чиқиш қийин. Аммо энди муносабатларни давом эттириш қанчалик тўғри бўлади? Дейлик, йигит билан ярашиб, яна аҳдлашдингиз. У билан бахтли бўлишингизга ишонасизми? Бир тўхтамга келишдан олдин ушбу саволлар ҳақида ўйлаб кўринг. У билан келажагингизни кўролсангиз, унга ишонсангиз юзма – юз гаплашиб олинг. У нима истаяпти, нега совчиларни қайтаряпти билишга ҳақлисиз.Ўз – ўзингиз билан савол – жавоб қилишда иккилансангиз, демак, ҳаётингизни у йигитсиз давом эттира оласиз.

Турмуш қуришга шошилманг

Бир муддат ўй – хаёлларингизга дам беринг. Ўша йигит ҳақида ўйламасликка уриниб кўринг. У билан ўтган дамларни умуман эсламанг.

Шуниси аниқки, ҳар қандай муносабат инсон қалбида из қолдиради. Мана шу из кетиши, яра битиши учун вақт керак. Аксинча, иккинчи муносабат қурилганида ҳам аввал хатоларнинг такрорланиши эҳтимоли юзага келади.

Собиқ севиклингиз совчиларни айнитаётганига аниқ исботингиз бўлса, қўнғироқ қилиб гаплашиб олинг. Нега бундай қилаётганини уриш-жанжалларсиз босиқлик билан сўранг. Ана шунда кўп нарса аён бўлади. Лекин агар исботингиз бўлмаса, бу масала шундайлигича қолгани мақул. Муҳими, сиз бахтли бўлишингизга ишонсангиз, бас. Ички ишонч инсоннинг тақдирини ҳал қилар даражада куч-қудратга эга, шуни унутманг!

Сизга маслаҳатимиз, асосий вақтингизни банд этиши мумкин бўлган машғулот топинг. Тил ўрганинг, пазандалик курсларида ўқинг, фитнес билан шуғулланинг. Дугоналарингиз билан учрашинг. Имкони бўлса, ўзингиз яшаб турган хона жиҳозлари, атрофингиздаги муҳитни ўзгартиринг.

Тўғри, муҳаббат, соғинч яна азоблаши, туйғулар бош кўтариб қолиши мумкин. Аммо сиз бунга чалғиманг. Курашишда давом этинг.

Ҳар бир қиз уни қадрлайдиган, ҳурмат қиладиган, чин дилдан севадиган инсон билан тақдир йўлларини боғлашга лойиқдир. Сиз тақдирингизда шундай инсон борлигига ишонинг!