САВОБМИ ЁКИ?..

Доимо бирор бир яхшилик қилишдан аввал "Савоб бўлар" дейишга ўрганиб қолганмиз. Аслидачи? Аслида ҳам шу ниятда иш қилармиканмиз?? Мени куни кеча бўлган бир воқеа ўзига жалб қилди ва жуда ўйлантириб қўйди. Холамнинг уйига баъзи нарсаларни олиб бориб беришим керак эди, катта ўғлим хархаша қилиб бир амаллаб эргашиб олди. Бола билан бўлганим учун автобус кутмай машруткада кетишга қарор қилдим. Унга чиқиб ўтиргач хамëнимдан пул олиб узатмоқчи бўлдим. Не кўз билан кўрайки ўғлим билан овора бўлиб шошганимдан пул олмай чиқибман. Ҳамëнимда эса 800 сўмгина пул ва автобус жетонлари бор эди. Қани энди ер ютсаю, кириб кетсам. Минг бир истихола билан бор пулимни узатиб "Ака, кейинги сафар қўшиб берарман, узр шошиб уйда қолдирибман" дедим. Хайдовчиям бўш келмай "Ҳамма сизга ўхшаб 200 сўмдан кам бериб кетаверса, бола чақамни ким боқади" деди. Тўғриси уялганимдан йиғлаворай деб зўрға ўтирардим. "Ака, тўғри тушунсангиз бўларди, 200 сўм билан ҳеч ким бойиб қолмайдику, узр сўрадим ахир. Ташлаб кетардим албатта" дедим. Бу ҳолатимни кўргач рўпарамда ўтирган бир ëшгина йигит ëнидан 200 сум чиқариб мен учун тўлаб юборди. Аллоҳ ундан рози бўлсин. "Раҳмат, барака топинг"- дедим. Йўлда давом этарканмиз ичимда алам ва ўксиниш билан кетардим. Машрутка ичи лиқ тўла, одам оладиган даражада эмас эди. Шу пайт ҳайдовчи "Шу йигитниям олиб олайлик, савоб бўлар" деб қолди. Йўловчи чиқиб жой йўқлигини кўриб, "Майли кейингисига чиқарман " деганди, ҳайдовчи менга "Сурилинг, буям ўтириб кетсин" деди. Мен тиззамда бола ва қўлимда оғир юк билан бўлганим учун "Жой йўқку" дедим. Шу вақт ҳайдовчининг ëнида ўтирган киши "Ўзи текинга кетаяптию, яна гап қайтаришини қаранг буни" деб гап ташлади. Мен ҳақ бўлсамда баҳслашмай деб индамадим. Чиққан йигитга эса йўл ҳақини узатиб юборишини айтишди. Шу вақт ҳаëлимдан бир гап ўтди, "Савоб учун йўловчи олган бўлсангиз, нега текинга олиб кетмайсиз?". Бу савобмиди ëки нафс талаби???!! (Умида Носирзода, 6.09.2013) "Нозик Ҳилқат" группасидан