БАХТ ЁҒДУСИ...
Бугун ишдан қайтаётганимда маршруткада орқароқда ўтирган бир қиз эътиборимни тортди. Оддий рус қизи, ёши йигирма бешлар атрофида. Бошқалардан ажралиб турадиган жойи йўқ, фақат биргина фарқи бор. Унинг юзида бахтни ўқиш мумкин эди. Лаблари ўзига бўйсунмай кенг табассумни ифода этарди. Нигоҳи узоқларда. Аввалига наушникда қизиқроқ нарса эшитиб кетяпти деган ҳаёлга бордим. Лекин у ҳеч нарса эшитмасди. Беихтиёр ўйга толдим. Қизиқ, уни бунчалик хурсанд қилган, севинтирган нима бўлди экан-а? Балки унга бугун севимли инсони турмушга чиқишни таклиф қилгандир. Ўзини яқин келажакда келин либосида бўлишини тасаввур қилиб, ширин ҳаёллар сураётгандир... Балки у аллақачон эрга тегиб ҳам бўлгандир. Бугун эса унга шифокори ҳомиладор эканлигини хабарини бергандир. Кўп ўтмай она бўлишини, фарзандини ҳидига тўёлмай тинмай эркалашини кўз олдига келтириб қувонаётгандир... Балки жон бериб меҳнат қилгани учун катта лавозимга тайинлашгандир бугун. Келажакда яхши каръера қилиб, моддий жиҳатдан ҳам қийналмаслиги ҳақидадир ўй-ҳаёллари... Нима бўлганда ҳам бугун унинг юзидан нур ёғилиб турарди... Бахтлилик ёғдуси... Ўзимча унинг севинчи сабабларини чамалаб турганимда миямга келган бошқа бир фикр этимни жимирлатиб юборди. Куни кеча яқин бир инсоним билан суҳбат қурганимизда унинг дарди ҳақида гаплашган эдик. Унинг ёши ҳам шу маршруткадаги бахтли қиз қатори. Оғир касаллик анчагина тушкунликка тушириб қўйган. Умрининг қанча қолганлигини шифокорлар ташхис қилишганидан сўнг эса... Кеча суҳбатимиз орасида бу дунёдан ҳеч нарса олиб кетмаслигимиз ҳақида фикрлаша туриб, негадир кафанни эсладик. Шунда менинг бир гапимга айтган жавоби юрагимни титратиб юборди: "Мен кафанлигимни тайёрлаб қўйганман”... Ҳали ўттиз баҳорни кўрмаган бу инсоннинг лафзидан бу сўзларни эшитиш оғир бўлди менга.. Аслида ҳеч ким қанча яшашини билмайди. Ҳаммамизнинг умримиз Аллоҳ белгилаганча бўлади.. Соппа-соғ юрган биз ҳам эртага фоний дунёни кутилмаганда тарк этишимиз ҳеч гап эмас. Лекин биз тайёрмизми?.. Икки кундан бери ҳаёлим паришон шу ўйлардан... Яна қайтиб маршруткадаги қизга боқдим. У ҳақиқатан бахтиёр кўринарди. Унга қараб бир нарсани чин дилдан тиладим. Дардга чалинган яқинимнинг ҳам, у қатори бошқа оғир касалларнинг ҳам юзларидан шундай бахт ёғдуси таралиши насиб қилсин... Уларнинг барча яқинларига, тузалиб кетишига умидвор бўлганларнинг барчасига яқинларининг қувончли, бахтли чеҳрасини кўриш насиб қилсин... (Б.М. 20.06.2013)