Бировнинг ёрига узбекча шеър

Бировнинг ёрига ёр бўлганимча,
Ёлғизлар ёрига қул булганим соз.
Иймонга бош эгиб то ўлгунимча,
Айрилиқ уйида тул бўлганим соз,

Тегманг юрагимнинг жароҳатига,
Иззиллаб тўкилар алвон дардларим,
Суратим шайдоси бўлмайди асло,
Покиза қалбимни севган мардларим.

Хўрсиниб хўрсиниб кунларим ботар,

Ўксиниб-ўксиниб йиғлар тунларим,
Босган изларимни қучсада хатар,
Сиздан нажот сўраб чиқмас унларим.

Фалакка етмаган оҳларим ҳануз,
Ёндириб тинмайди сийрат боғини, 
Умрим дафтарига ёзилмасдан куз,
Яратган ювсайди кўнгил доғини.

Ёлғизнинг ҳаёти сизга бегона,
Куйган юрагининг оташи йўқдир,
Таъсирин кўрсатмас ишқнинг пайкони,
Армони бағридан юлинмас ўқдир.

Бахтлисиз бағрингиз бутундир бутун,
Ярим дил,яримта умидгинам ҳам,
Сўзласам,кўкларга ўрлайди тутун,
Ишқингиз бўлолмас дардимга малҳам.

Болданда ширинроқ бўлсада сўзлар,
Кўксимга санчилар ҳақорат бўлиб,
Дўст бўлиб кирдингиз кўнглим уйига,
Дўст бўлиб қайтинг сиз мардона кулиб.

Елкамга ортилган юкларим анча,
Манзилга ё етиб,ёки етмайман,
Чидайман синови булмасин қанча,
Тангридан бўлакка қўлим тутмайман.

Чангини чиқармай босган изимнинг,
Яшайман ҳеч кимга зиёним тегмай,
Қучиб уйготмасин майли мени бахт,
Умримни ўтказай бошимни эгмай.

Кечиринг озорим сўзимда бисёр,
Аммо бўлолмайман сиз суйган дилдор,
Дил берган,қўл берган гулингиз билан,
Вафо чаманида бўлинг бахтиёр.

Бировнинг ёрига ёр бўлганимча,
Ёлғизнинг ёрига қул бўлганим соз...