Kuting, Ona, yoningizga borayapman! uzbekcha sher

Kuting, Ona, yoningizga borayapman!
Kuting, Ona, yoningizga borayapman!

Ona, Dunyo tashvishidan horiyapman
Vaqt beshafqat deya gohi noliyapman,
Bilib-bilmay, bag‘ritosh bop qolayapman,
Kuting, Ona, yoningizga borayapman!

Men baxtliman bag‘ringizda Ona faqat,
Dalli Dunyo aytganimday ko‘p beshafqat,
Osmon olis, zamin zarang, anqodir Baxt,
Ozor topib, uvalanib, nurayarman,
Kuting, Ona, yoningizga borayapman!

Ko‘kka qo‘lim cho‘zsam qarang yetmayapti,
Hasratimni yerga aytsam yutmayapti,
Sizsiz hatto ichgan suvim botmayapti,
Diydoringiz olovida yonayapman,
Kuting, Ona, yoningizga borayapman!

Sizsiz menga bu Dunyoning zavqi nima,
Sig‘mas sizsiz bazmu jamshid bu ko‘nglima,
Tashvishlarim to‘siq bo‘lmang, siz yo‘lima,
Ona, sizsiz yaproq kabi sulayapman,
Mehr istab, yoningizga borayapman!

Dil qatiga olis damlar hissin solib,
Umringizni Haqdan so‘ray ming yolvorib,
Sitamlardan sitilgan shu jonni olib,
Jannatdayin bag‘ringizni qumsayapman,
Kuting, Ona, yoningizga borayapman!

Fikr qo'shish