O‘sha - O‘sha yurak - Yurak haqida she’r sevgi haqida she'r

O‘sha-o‘sha yurak, bu o‘sha yurak!
suyukli, suyuksiz, suyaksiz yurak!
Xar xil ko‘yga tushib, oshagan sinov
kerakli, keraksiz, yuraksiz yurak!

Toshlarga urilib o‘lmagan yurak
dunyo kezib baxtli bo‘lmagan yurak
mendan o‘zga barcha joylarni ko‘rib
ko‘ksimni bir bora ko‘rmagan yurak

Sevgiga intilib talpingan yurak
ko‘z yoshini menga artingan yurak
oy kabi kichrayib, to‘lib galma - gal
majnundek xech kimga tanilgan yurak

Tuyg‘ularga qalqon tutmagan yurak
biron marta jangda yutmagan yurak
o‘zini o‘ylab xech bilmadi charchoq
baxtni o‘zgalardan kutmagan yurak

Sotilgan, yorilgan, otilgan yurak
Azroilga taqdim etilgan yurak
xayotning azobi qancha ko‘p bo‘lsa
barchasiga yolg‘iz tutilgan yurak

O‘sha-o‘sha yurak, bu o‘sha yurak
suyukli, suyuksiz, suyaksiz yurak
Xar xil ko‘yga tushib, oshagan sinov
kerakli, keraksiz, yuraksiz yurak...