Ko‘nglim yig‘laganda qayda edingiz? uzbekcha she'r

Balki kimsa topmas joyda edingiz,
Dengiz tubida yo oyda edingiz,
Kechalar Xudo deb o‘rtanib zor-zor,
Ko‘nglim yig‘laganda qayda edingiz?...

Ochimdan o‘lmadim chiqmadi jonim,
Kimni ham boy qilgan bir burda noni,
Shukur, sinovlardan o‘tdi iymonim,

Qadrim yig‘laganda qayda edingiz?...

Borimda bulog‘im dedingiz Kavsar,
Yo‘g‘imda sizmasmu? yuz burgan ovsar,
Do‘st tutib lahzada kechgan al hazar,
Qo‘lim yig‘laganda qayda edingiz?...

Ortimdan soyaday pinhon kuzatgan,
Chap berib o‘zimni chohga qulatgan,
Otgan siz, men o‘sha sodda, uzatgan,
Gulim yig‘laganda qayda edingiz?...

Odamiylik sizga shunchaki o‘yin,
Odamni chin bilish ekanda qiyin,
Yetar, xayotimdan endi daf bo‘ling,
Baxtim yig‘laganda qayda edingiz?
Diydor, yig‘laganda qayda edingiz?...