Kimgadir borligim... uzbekcha she'r

Kimgadir borligim o‘zi bir dunyo,
Sur’atim avaylab yurakka ildi.
Kimgadir aksincha, keldimmi malol,
Ertadan kechgacha g‘iybatim qildi.

Yana kim sog‘indi, har on intizor,
Har kecha tushlarin mehmoni o‘zim.
Allakim haydadi, kechdilar shunday,
Shunchaki unutdi, yoshlatib ko‘zim.

Har kuni yo‘qladi yiroqdan kimdir,
Yonimda yashadi kimdir behabar.
Kimgadir yoqmadim, kimgadir yoqdim,
Kim shirin bol tutdi, kim tutdi zahar.

Kim shodlik ulashdi g‘amlar haqqiga.
Borimni ol deya kamlar haqqiga.
Allakim yashadi hayotdan sarxush,
Men chekkan azoblar, namlar xaqqiga.

Kim baxtim tiladi tong otmay turib,
Ko‘nglimni bog‘iga gul ekib ketdi.
Yo‘limga tuzoqlar qo‘yib kim birov,
Ko‘rgan har kunimga pushaymon etdi.

Bir kuni dunyodan ketaman kechib,
Yog‘och ot ustida oq to‘nim kiyib.
Shunda ham kimlardir azasi yolg‘on,
Kimlardir yig‘laydi chin dildan kuyib.