Shayton aralashdi

Rivoyat qilinishicha, bir kishi hazrati Abu Bakr Siddiqni haqorat qildi. Payg‘ambar alayhissalom ham o‘sha joyda edilar. U zot bo‘layotgan voqeadan ajablanib, hatto tabassum ham qildilar.

Haligi kimsa haqoratni juda ko‘paytirib yuborgach, Abu Bakr ham unga bir-ikki og‘iz gap bilan javob qaytardilar. Shunda Nabiy alayhissalomning jahllari chiqdi va joylaridan turib ketdilar. Abu Bakr ham ortlaridan ergashib:

– Ey, Allohning Rasuli, u meni so‘kkanida indamay o‘tirgan edingiz, ba’zi so‘zlariga javob qaytarganimda esa, g‘azablanib, turib ketdingiz? – dedilar.
Shunda Payg‘ambar alayhissalom:

– Oldin yoningda bir farishta turib, haqoratlarni sendan qaytarayotgan edi, bir-ikki so‘z aytganingdan keyin farishta ketib, shayton keldi, men shayton bor joyda o‘tirmayman, – dedilar.

"Ko‘hna dunyo rivoyatlari" kitobidan

HOZIRGI ZAMONDA: Hozir bunday hollarda shaytonning kelishining hojati ham yo‘q. O‘zimiz hatto shaytonni xijolat qiladigan darajada javobini berib yuboradigan bo‘lganmiz! Bu ishimiz bilan nomai a’molimizni ortiqcha gunoh so‘zlar bilan to‘ldirayotganimizni o‘ylamaymiz ham!
Afsus...bazilarimiz Allox uzi kechirsin Barchamizni