Dunyo chappasiga aylanib ketdi uzbekcha she'r

... Dunyo chappasiga aylanib ketdi,
Jarga qulab tushdi baland qoyalar...
Bugun taraqqiyot cho‘qqiga yetdi,
Javlon urmoqdalar "erkak" doyalar...

.. Xurlik istadilar, nafsga berib erk,
Sochilgan simobday uchdi xayollar...
Erkaklar libosi bo‘g‘zigacha berk,
Yarim ochib qo‘ydi ko‘ksin ayollar...

... Ayol ayol bo‘lsin, erkaklar erkak,

Qaydan uchib keldi qizil qarg‘alar..?
Ularning ismini kim deyish kerak..?
Erkak qulogiga taqsa sirg‘alar...

... Rasadxona qurib, yulduz ko‘rganlar,
Ilmni dunyoga o‘rab qo‘yishdi...
Kecha qo‘ziqorin terib yurganlar,
Ilmla dunyoni so‘rab qo‘yishdi...

... Tovuq boshqarmoqda katakni endi,
Tuxum bosib qoldi dakan xo‘rozlar...
O‘pka egalladi yurakni endi,
Obro‘ topib qoldi masxarabozlar...

... Hayoli bo‘lganni qilishdi uyat,
Halol yashaganni deyishdi "qoloq" ...
Tark etib ketdi-yu dillarni oyat,
Endi tarvuz eksam chiqar oshqovoq...

... Ey shoir, shoshilma... To‘xtagin bir pas,
Buncha g‘am-g‘ussani ko‘tarmas yurak...
Xamma o‘qisin deb qog‘ozga emas,
She’rlarni osmonga yozishing kerak...