Bildim... uzbekcha she'r

O‘qimay, o‘rganmay, g‘aflatga botib,
Jazo bu - musibat, deya bilibman.
Tavba yoshlariga g‘arq bo‘lmoq uchun,
O‘zimdan kechmoqqa tayyor turibman.

Bildim...

Qur’on o‘qiganda ko‘z yosh to‘kmagan,
Bu so‘qir ko‘zlarim jazodan darak.
Dillarni ranjitgan dilga botguvchi,

Zaharli so‘zlarim jazodan darak.

Solih amallarga shoshmay, behuda
O‘tkazgan kunlarim jazodan darak.
Tahajjud neligin unutib yotgan
Bebahra tunlarim jazodan darak.

Muqaddas oylarning ajridan qolgan
Mazmunsiz oylarim jazodan darak.
Allohning buyrug‘in pisand qilmasdan
Eringan onlarim jazodan darak.

Mol-dunyo, shon-shuhrat fitnalariga
Talpingan bu dilim jazodan darak.
Fisq-fasod, yolg‘ondan tiyilolmagan
Suyaksiz bu tilim jazodan darak.

O‘qimay, o‘rganmay, g‘aflatda qolib,
Naqdi umrimizni o‘tkazdik, ey voh!
Endi tahajjudda tavbalar qilib,
Istig‘for aytaylik! Kechir, ey Alloh!