Yordamga kel, aziz qur'onim uzbekcha she'r

Esga olsam bobokalonim,
Qizaradi yuzim-tobonim,
Gunohlarga to‘ldi har onim,
Sustligidan dinu imonim,
Yordamga kel, aziz qur'onim.

E’tiqodim dinimni sotdim,
Urf-odatim, tilni yo‘qotdim,
Yetmish yillar g‘aflatda yotdim,
Qiynaladi mening vijdonim,
Yordamga kel, aziz qur'onim.

Elimda bor ko‘ngli g‘arazlar,
O‘g‘li otasidan arazlar,
Ko‘paydi ko‘p o‘g‘ri, marazlar,
Kazzoblarga to‘ldi makonim,
Yordamga kel, aziz qur'onim.

Yoshlarning hech salomlari yo‘q,
Gapda shirin kalomlari yo‘q,
Chunki, dini, islomlari yo‘q,
Senda hikmat ezgu armonim,
Yordamga kel, aziz qur'onim.

Qondoshlarga oqibat qani,
Elga izzat va hurmat qani,
Do‘stga, yorga sadoqat qani?
Vafosizlik qildi janonim,
Yordamga kel, aziz qur'onim.

Ba’zilarning ibosi yo‘qdir,
O‘g‘il-qizlar hayosi yo‘qdir,
Etiqodi, xudosi yo‘qdir,
Shariatim, toptaldi sha’nim,
Yordamga kel, aziz qur'onim.

Go‘daklarni tashlab ketsalar,
Onalikni inkor etsalar,
Qo‘li qotillikka yetsalar,
Alamimdan ezildi jonim,
Yordamga kel, aziz qur'onim.

Oppoq nonni axlatga otdik,
Ochlik azoblarini totdik,
Daraxt kesib gunohga botdik,
Baraka yo‘q, quruq xirmonim,
Yordamga kel, aziz qur'onim.

Ko‘p ilmni bilolmay qoldim,
Nursiz, zulmat ichra yo‘qoldim,
Men omiyman, kam saboq oldim,
Qashshoq mening tilu zabonim,
Yordamga kel, aziz qur'onim.

Har kaloming hayratga solur,
O‘qiganning gardi yo‘qolur,
Oyatlaring dardimni olur,
Tabobatim, dori - darmonim,
Yordamga kel, aziz qur'onim.

Varaqlaring ko‘zga surtayin,
Har kaloming e’zoz etayin,
G‘animlaring yiqib turtayin,
Bunga yetmas mening imkonim,
Yordamga kel, aziz qur'onim.

Xazinamsan umri barqaror,
Bunga ko‘plar bo‘ldilar iqror,
Uzim Sening hukminga tayyor,
Kamolotga eltuvchi shonim,
Yordamga kel, aziz qur'onim.