Sizni sog‘inganda, yo, Rasululloh uzbekcha she'r

Dunyo arzimaydi diydoringizga,
“Ummatim” deb chekkan ozoringizga.
To‘yib termulsaydim ruxsoringizga,
Sizni sog‘inganda, yo, Rasululloh.

Sabrimla umidlar sinashgan chog‘i,
Dilga ko‘chdi oyning azaliy dog‘i.
Bitganga o‘xshaydi umrim adog‘i,
Sizni sog‘inganda, yo, Rasululloh.

Makkaga piyoda yetgim keladi,
Sog‘inchni sahrodek yutgim keladi.
Siz yotgan tomonga ketgim keladi,
Sizni sog‘inganda, yo, Rasululloh.

Salavot joylansa dudog‘larimga,
Baytulloh aylansa qarog‘larimga.
Siyrat sir so‘zlaydi nigohlarimga,
Sizni sog‘inganda, yo, Rasululloh.

Sog‘inch asli darddir judayam og‘ir,
To‘kilib boradi kundan- kun bag‘ir.
Ruhim ayro bo‘lar tanimdan axir,
Sizni sog‘inganda, yo, Rasululloh.

Xayolga cho‘maman goho indamay,
Xayollar olislar qasd etib atay.
Asri Saodatga bir zumga qaytay,
Sizni sog‘inganda, yo, Rasululloh.

Dunyo arzimaydi diydoringizga...