Sizda qolgan ko‘nglim qaytarib bering sevgi haqida she'r
Armonlar ko‘z ochsa dilimda qat-qat,
Har ne mushkul bo‘lsa, qilarman toqat.
Men ta’ma qilmayman hech narsa, faqat...
Sizda qolgan ko‘nglim qaytarib bering.
Yoki hijron bizga qismat atalar,
Sinovidan dilga ozor qadalar.
Qo‘ying, kerak emas osmon va’dalar,
Sizda qolgan ko‘nglim qaytarib bering.
Nastarin gullarin kutmayman mayli,
Urib turar yurak umid tufayli,
Sizda qolgan ko‘nglim qaytarib bering.
Ozorlar yarashsa nahotki bizga,
Yillar-ki, chiziqni tortmoqda yuzga.
Sizsiz dil to‘foni tushadi izga,
Sizda qolgan ko‘nglim qaytarib bering.
Biz bilmay yashadik qora rang borin,
Olamni pushti deb atadik barin.
Ko‘ngilsiz baxt yarim, muhabbat yarim,
Sizda qolgan ko‘nglim qaytarib bering.
Ovunib o‘tibmiz bahorlariga,
Mast bo‘lib bulbulning izxorlariga.
Tun o‘rnin bermasa nahorlariga,
Sizda qolgan ko‘nglim qaytarib bering.
Hokisor tuproqman, osmon kerakmas,
O‘zim bir dunyoman jahon kerakmas.
O‘zini topmagan yurak yurakmas,
Sizda qolgan ko‘nglim qaytarib bering.