Tuni bilan yoqqan yomg‘irlar sevgi haqida she'r

Tuni bilan yoqqan yomg‘irlar
Yuvib o‘tdi tonglar yuzini.
Men izladim
o‘zim uchun sir
Bo‘lgan baxtning yorug‘ izini...

Keldimi deb sendan xabarlar, 
Eshiklarni necha bor ochdim.

Daydi shamol bebosh boladay
Derazamni sindirib qochdi! 

Tuni bilan qiynaldi yurak
Yeta olmay nur yo‘llariga.
Isming qo‘ndi kapalak kabi
Goh tushimga, 
goh qo‘llarimga...

Sen kelmading, 
biroq bu gal ham...
Men kunning qon yuziga boqib -
G‘ijimlanib otilgan xatday
Yuragimni yubordim yoqib!..

...Tuni bilan yomg‘irlar yog‘di...