Qiz farzandning fazilati
1. Nabiy sollallohu alayhi vasallamning jufti halollari Oisha roziyallohu anho shunday so‘zlab berdi:
«Bir ayol ikki qizi bilan oldimga narsa so‘rab keldi. Huzurimda bir dona xurmodan boshqa narsa yo‘q edi. Unga o‘shani bergan edim, uni ikki qiziga bo‘lib berdi. So‘ng turib, chiqib ketdi. Nabiy sollallohu alayhi vasallam kirgan edilar, buni u zotga aytib berdim. Shunda u zot: «Kim mana shu qizlardan birortasini qaramog‘iga olsa va ularga yaxshilik qilsa, ular unga do‘zaxdan parda bo‘lishadi», dedilar».
Imom Buxoriy rivoyati.
2. Anas ibn Molik roziyallohu anhudan rivoyat qilinadi:
«Rasululloh sollallohu alayhi vasallam: «Kim ikki qizni balog‘atga yetgunicha tarbiyalab-o‘stirsa, Qiyomat kuni men bilan (mana bunday) keladi» deb, barmoqlarini birlashtirib ko‘rsatdilar».
Imom Muslim rivoyati.
3. Rasululloh sollallohu alayhi vasallam:
«Qizlarni (turmushga uzatishda) majburlamanglar, chunki ular munis va bebahodirlar», dedilar.
Imom Ahmad va Tabaroniy rivoyati.
4. Rasululloh sollallohu alayhi vasallam:
«Kimda uchta qiz yoki uchta opa-singil bo‘lsa yoki ikki qiz yoki ikki opa-singil bo‘lsa, ular bilan go‘zal munosabatda bo‘lsa va ular haqida Allohdan qo‘rqsa, u kishi uchun jannat bo‘lur», dedilar.
Ibn Hibbon rivoyati.
5. Rasululloh sollallohu alayhi vasallam
«Kimning uchta qizi bo‘lsa, u kishi ularga sabr qilsa, o‘zining mablag‘idan yedirsa, ichirsa va kiyintirsa, Qiyomat kuni uning uchun do‘zaxdan parda bo‘ladi», dedilar.
Ibn Moja rivoyati.