O'g‘lingizga haridor bo‘lib keldik
Ular to‘rtinchi qavatdan joy sotib olib, ilk bora ayvonga chiqib nonushta qilishardi. Yigitning ko‘zi ro‘paradagi xuddi shunday ayvonda kir yoyayotgan qizga tushib qoldi. U ilgari hovlida yashaganigami, bunday holni ko‘rmagani uchunmi, g‘alati bo‘lib ketdi.
Darrovda orqa o‘girib, nonushtani qilaverdi. Ota-onasi e’tibor qilmadi ham. Yigitning yuragi bir turlandi-yu ko‘nglidan bir nimalar o‘tdi. Shu bir nimalar uni ishga otlangan joyidan orqaga qaytardi. Istiholaga borib, sustlik qilishni xohlamadi. Boyagi xonadonga chiqib bordi. Eshikni onasi tengi bir ayol ochdi. Salom berdi, o‘zini tanitdi. Hozirgina ko‘rganlarini va ayvonga parda tutsalar yaxshi bo‘lishini qiynalib bo‘lsa ham aytdi. O‘g‘li tengi bolaning aql o‘rgatishi ayolga yoqmadi. Xoynahoy ota-onasining gapi bilan chiqqanov, degan xayolga bordi.
– Ayvon bizziki, maboda ko‘ziylarga to‘g‘anoq bo‘layotgan bo‘lsak, o‘ziylar parda tutvolaqoliylar, aylanay, – dedi
– Biz-ku parda tutvolamiz-a, boshqalar-chi, boshqalar tomosha qil-ye-b o‘tiraverishsa, qizingizmi, keliningizmi – ularning sha’niga yaxshimas-da, opoqi.
Bu gapdan keyin ayol jimib qoldi. Yigit ko‘ziga ancha ba’mani mulohazali ko‘rindi. Yigit kechki payt ishdan kelib, ayvonga chiqib, ro‘paraga ko‘zi tushdi-yu xursand bo‘lib ketdi. Hayriyat, gaplari osmonga uchmapti. Gapni tushunadigan odamlar ekan. Ammo ish bu bilan tugamadi. Kechqurun erta bilan ko‘rgan ayoli, eri bilan ularnikiga kirib keldi. Uy muborak, deb tanishgan bo‘lishdi. Shu payt mehmon erkak chapaniroq ekanmi, yigitning otasini so‘roqqa tutib qoldi:
– O‘g‘lingiz uylanganmi?
– Yo‘q.
– Unashtirganmisiz?
– Yo‘q.
– Unda biz o‘g‘lingizga xaridor...
– Xaridor?
– Meni bir mastura qizim bor, bozori qizib, sovchi ustiga sovchi kelib yotibdi, xayolimda unisi o‘poq, bunisi so‘poq. Menga xuddi sizning o‘g‘lingizga o‘xshagani tanishmi-notanishmi ishqilib, ayollarning sha’nini o‘ylaydigan, himoya qiladigan kuyovto‘ra kerak, xo‘p desangiz quda bo‘lsak... Kamiga ayol yigitning ertalabki gaplarini aytib berdi. Shundan keyingina yigitning ota-onasi nima gapligini tushunib yetdilar.
Xullas, to‘y bo‘ldi. To‘yning ta’rifi og‘izdan-og‘izga o‘tib, mana sizlarga ham yetib keldi...