Duoda qoim bo‘lmoqning fazilati
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Abu Hurayra roziyallohu anhudan rivoyat qilinadi:
«Rasululloh sollallohu alayhi vasallam Ramazon kechalarini ibodat bilan bedor o‘tkazishga targ‘ib qilar, ammo qat’iy buyruq bermas edilar. Shunda u zot: «Kim Ramazonda iymon va ixlos bilan qoim bo‘lsa, o‘tgan gunohlari mag‘firat qilinadi», der edilar».
Buxoriy va Muslim rivoyat qilishgan.
Ramazon oyidan imkon qadar ko‘proq foyda olish uchun bajarish lozim bo‘lgan 13 amal:
1. Iloji boricha ko‘proq Qur’oni karimni o‘qish. Bunda uning ma’nolarini tushunish va oyatlarning mazmuni haqida chuqurroq mulohaza yuritishga e’tibor berish lozim.
2. Nafl namozlarini o‘qish.
3. Quyidagi savollar haqida chuqur fikr yuritib ko‘rish: «Men kimman?», «Qayerdan keldim va qayerga ketmoqdaman?», «Mendan Alloh taolo nimani xohlaydi va mening Uning oldidagi majburiyatlarim qanday?».
4. O‘tmishga nazar solish, bo‘lib o‘tganlarga baho berish, hozirgi ahvoliga nazar solib, kelajak haqida o‘ylab ko‘rish.
5. Ilgari qilingan gunohlarga pushaymon bo‘lgan holda, har kechani oxirgi imkoniyat sanab, duo qilish bilan o‘tkazish.
6. Imkon qadar ko‘p zikr qilish.
7. Kimnidir xafa qilib qo‘ygan bo‘lsa, o‘sha insondan uzr so‘rash va u bilan yarashish.
8. Arazlashib qolganlarni murosaga keltirish, g‘am-anduhdagilarga taskin berish.
9. Beva-bechora va muhtojlarga sadaqa berish, yetim-yesirlar va xastalarning holidan xabar olish, ularga g‘amxo‘rlik ko‘rsatish, qo‘lgan kelgan yordamini ayamaslik.
10. Yaqinlar va qavmu – qarindoshlardan hol-ahvol so‘rash, ularni yo‘qlash va kerakli masalalarda ko‘maklashish.
11. Diniy yig‘inlarda va dinga oid jamoat tadbirlarida ishtirok etish.
12. Farz namozlarni jamoat bilan birga ado qilishga harakat qilish.
13. Marhumlarning qabrini ziyorat qilish.
Albatta, bu amallar faqatgina Ramazon oyida bajarilishi kerak, degan fikrdan yiroqmiz. Lekin ular uchun bu oyda juda ko‘plab ajru savoblarga ega bo‘lish imkoni mavjud.
Abu Hurayra roziyallohu anhudan rivoyat qilinadi: «Rasululloh sollallohu alayhi vasallam: «Uch toifa kishining duosi rad etilmaydi: ro‘zadorning og‘zini ochgunicha qilgan duosi, odil imomning duosi, mazlumning duosi».
Imom Termiziy va Ibn Moja rivoyati.