Qiyomat kuni xursand bo'lay desangiz...
Oxiratda har bir bandaning nomai a’moli o‘ziga ko‘rsatiladi. Bu haqida Alloh taolo shunday degan: “Biz har bir insonning amalini bo‘yniga ilib qo‘yganmiz. Qiyomat kuni unga ochiq holda ro‘baro‘ bo‘ladigan bir kitobni (ya’ni, nomai a’molini) chiqarib (ko‘rsatamiz. O‘shanda unga deyiladi:) “Kitobingni o‘qi, (qancha savobing, qancha gunohing borligini hisob qil!) Bugun o‘z nafsing o‘zingga qarshi yetarli hisob-kitob qiluvchidir”. (Isro surasi, 13-14-oyatlar).
Oxiratda nomai a’moli o‘ng tarafdan berilgan inson xursand bo‘lib: “Mana mening kitobimni o‘qinglar..!” deydi. Nomai a’moli chap tarafdan berilgan kishi esa: “Eh, qani endi menga kitobim berilmasaydi! Hisob-kitob neligin bilmasaydim!” deb oh chekib qoladi.
Hadislarda aytilishicha, tirikliligida ko‘p istig‘for aytgan inson qiyomat kuni nomai a’molini ko‘rib qalbi quvonchga to‘ladi.
عَنْ عَبْدِ اللهِ بْنَ بُسْرٍ رَضِيَ اللهُ عَنْهُ قَالَ: قَالَ النَّبِيُّ صَلَّى اللهُ عَلَيْهِ وَسَلَّمَ: طُوبَى لِمَنْ وَجَدَ فِي صَحِيفَتِهِ اسْتِغْفَارًا كَثِيرًا. رَوَاهُ ابْنُ مَاجَهْ وَالْبَيْهَقِيُّ وَسَنَدُهُ صَحِيحٌ.
Abdulloh ibn Busr roziyallohu anhu Nabiy sollallohu alayhi vasallamdan rivoyat qiladi: “Nomai a’molida ko‘p istig‘forni ko‘rgan bandaga qanday yaxshi!” (Ibn Moja, Bayhaqiy rivoyat qilgan. Hadis sanadi sahih).
Inson og‘zidan chiqadigan har bir so‘z amallar sahifasiga yozib boriladi. Qiyomat kuni kishining nomai a’moli o‘ziga ko‘rsatiladi, “Mana kitobingni o‘qi”, deyiladi. Osiy bandalar qilday gunohi ham qolmay bitib qo‘yilganini ko‘rib dahshatga tushadi. Ko‘p istig‘for aytgan mo‘min banda esa sahifasini ko‘rib xursand bo‘ladi. Chunki u dunyoda ko‘p yaxshi amallar qilgan, istig‘for aytgan, tilini behuda so‘zlardan tiygan edi.
عَنْ الزُّبَيْرِ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ: مَنْ أَحَبَّ أَنْ تَسُرَّهُ صَحِيفَتُهُ فَلْيُكْثِرْ فِيهَا مِنْ الإِسْتِغْفَارِ. رَوَاهُ الْبَيْهَقِيُّ وَالطَّبَرَانِيُّ وَسَنَدُهُ حَسَنٌ.
Zubayr ibn Avvom roziyallohu anhudan rivoyat qilinishicha, Rasululloh sollallohu alayhi vasallam shunday deganlar: “Kimda-kim nomai a’molini ko‘rganda xursand bo‘lay desa, unda istig‘forni ko‘paytirsin!” (Bayhaqiy, Tabaroniy rivoyat qilgan. Hadis sanadi hasan).
Abu Minholdan rivoyat qilinadi: “Qabrda banda uchun ko‘p istig‘fordan ko‘ra yaxshiroq qo‘shni (ya’ni, hamroh) bo‘lmaydi”.
Bakr ibn Abdulloh Muzaniy shunday degan: “Sizlar ko‘p gunoh qilyapsizlar. Endi istig‘forni ham ko‘paytiring! Chunki, banda qiyomat kuni nomai a’molining har ikki qatorida istig‘forni ko‘rsa, boshi osmonga yetadi”.
📚«Istig‘forning 40 xosiyati» kitobidan