Qur'ondan shifo topganlar qissasi

Rivoyat qilinishicha, bir guruh sahobalar safarga chiqishdi. Arablar yashaydigan joyda qo‘nim topib, ulardan oziq-ovqat so‘rashdi. Ammo qabiladagilarning mehmon qilgilari kelmadi. Shu orada o‘sha qabila boshlig‘ini chayon chaqib oldi.

Qabila a’zolari rahbarlari sog‘ayishi uchun qo‘llaridan kelgan barcha choralarni ko‘rishdi. Biroq hech qanday naf chiqmadi. Shunda ulardan biri:

– Anavi kishilardan so‘rab ko‘ringlar. Shoyad foydasi tegadigan biron narsa bo‘lsa! – dedi.
Qabila a’zolari sahobalar oldiga kelib so‘rashdi:

– Hoy, musofir odamlar! Boshlig‘imizni chayon chaqib oldi. Harchand urinsak ham, hech qanday natija chiqarolmadik. Ichingizda biron kishi bunga davo topa oladimi?

– Ha, men dam solaman. Lekin, sizlar bizni mehmon qilishdan bosh tortdingiz. Endi biron mukofot tayinlamaguningizcha dam solmayman! – dedi sahobalardan biri.

Ular bir to‘da qo‘y evaziga kelishib olishdi. Haligi kishi Fotihani o‘qib dam sola boshladi. Bemor dard ko‘rmagandek tezda sog‘ayib ketdi. Shundan so‘ng qabila boshlig‘i:
– Ahdingizga vafo qiling. Kelishilgan narsani ularga bering! – deb buyurdi.

Sahobalardan biri dedi:

– Qo‘ylarni taqsimlang!

Dam solgan kishi bo‘lsa:

– Shoshmanglar! Avval Nabiy sollallohu alayhi va sallam oldilariga boraylik, bo‘lgan voqeani u zotga aytaylik, nima derkinlar, – dedi.

Ular Rasululloh alayhissalom huzurlariga borib, bo‘lgan voqeani aytib berishdi. Shunda Payg‘ambarimiz alayhissalom dam solgan kishidan:

– Fotiha surasi bilan dam solishni qayerdan bilasan? – deb so‘radilar. Keyin:

– To‘g‘ri qilibsizlar. Qo‘ylarni taqsimlang, menga ham ulush ajrating, – deb kulib qo‘ydilar.

Ibn Qayyim shunday degan: “Bu hadisga ko‘ra, hasharot chaqqan odamga Fotiha surasini o‘qish davo bo‘lgan. Qiroat unga dori o‘rniga o‘tgan. Balki dam solish bilan topgan shifoni dori-darmon bilan topa olmasdi ”.

Fotiha surasi shifobaxshligini Ibn Qayyim tajribada sinab ko‘rgan. U kishi shunday hikoya qiladi: “Makkada yashagan chog‘imda kasal bo‘lib qoldim. U yerda na tabib, na bir dori topa oldim. Shunda o‘zimni Fotiha surasi bilan davoladim, uning ajoyib ta’siri borligiga amin bo‘ldim. Ozroq zamzam suvidan olib, unga Fotihani o‘qib ichdim.

Natijada darddan butunlay xalos bo‘ldim. Shundan so‘ng juda ko‘p kasalliklarni Fotiha surasi bilan davoladim. Bundan judayam ko‘p foyda topdim. Kimdir kasallikdan shikoyat qilib kelsa, unga Fotiha bilan dam solishni tavsiya qilardim. Bemor tezda sog‘ayib ketardi ”.

Rivoyat qilinishicha, Amr ibn Hazm Ansoriy roziyallohu anhu Madina shahrida ilon chaqqan ayolga dam solishga chaqirildi. Biroq u rozi bo‘lmadi. Amrning bu ishi Payg‘ambar alayhissalomga xabar qilingandi, uni huzurlariga chaqirtirib, nega bunday qilganini so‘radilar. Amr:

– Yo Rasululloh, axir o‘zingiz dam solishdan qaytarasiz-ku! Siz qaytargan ishni qanday qilaman?! – deya savol ohangida murojaat qildi.
Shunda Amrdan – qaysi oyat yoki duoni o‘qib dam solishini – so‘radilar. Amr u zotga dam solishda o‘qiydigan oyatlarini tilovat qilib berdi. Nabiy alayhissalom ruqyani eshitgach:

– Hechqisi yo‘q. Uni o‘qib dam solaver, – deb Amrga ruxsat berdilar.