Umraning fazli
Umraning fazli
Alloh taolo aytadi: «Haj va umrani Alloh uchun komil suratda ado qiling!» (Baqara: 196).
عَنْ أَبِي هُرَيْرَةَ رَضِيَ اللَّهُ عَنْهُ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ: «الْعُمْرَةُ إِلَى الْعُمْرَةِ كَفَّارَةٌ لِمَا بَيْنَهُمَا وَالْحَجُّ الْمَبْرُورُ لَيْسَ لَهُ جَزَاءٌ إِلاَّ الْجَنَّةُ» (رواه البخاري)
Abu Hurayra roziyallohu anhudan rivoyat qilinadi: Rasululloh sollallohu alayhi va sallam dedilar: «Umra keyingi umragacha o‘rtadagi gunohlarga kafforatdir. Mabrur hajning jannatdan boshqa mukofoti yo‘qdir» (Imom Buxoriy rivoyati).
عَنْ عَبْدِ اللَّهِ بْنِ مَسْعُودٍ رَضِيَ اللَّهُ عَنْهُ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «تَابِعُوا بَيْنَ الْحَجِّ وَالْعُمْرَةِ فَإِنَّهُمَا يَنْفِيَانِ الْفَقْرَ وَالذُّنُوبَ كَمَا يَنْفِي الْكِيرُ خَبَثَ الْحَدِيدِ وَالذَّهَبِ وَالْفِضَّةِ وَلَيْسَ لِلْحَجَّةِ الْمَبْرُورَةِ ثَوَابٌ إِلاَّ الْجَنَّةُ» (أخرجه الترمذي).
Abdulloh ibn Mas’ud roziyallohu anhudan rivoyat qilinadi: Rasululloh sollallohu alayhi va sallam aytdilar: «Umra va hajni birin-ketin qilib turingiz! Chunki haj bilan umra faqirlik va gunohlarni xuddi bosqon temir, oltin va kumush ustidagi kirlarni ketkazganidek yo‘qotib tashlaydi. Mabrur hajning jannatdan boshqa mukofoti yo‘qdir» (Imom Termiziy rivoyati).
Sharh:
Umra qilish va uni ketma-ket qilib turish ulug‘ ibodatlardan bo‘lib, Rasululloh sollallohu alayhi va sallam uning gunohlarga kafforat va xatolarning mag‘firat qilinishiga sabab bo‘lishini aytganlar, haj bilan umrani ketma-ket qilishda garchi pul-mol sarf bo‘lsa-da, aslida u faqirlikning ketishi va boylik kelishiga sababdir, deganlar.
Bugungi darsdan olinadigan foydalar:
1. Umraning fazli, uning gunohlarning mag‘firat qilinishiga sabab bo‘lishi;
2. Haj bilan umrani ketma-ket qilishning yaxshiligi;
3. Bunday qilish kambag‘allikning ketishiga sabab ekani.