Rosululloh sollallohu alayhi vasallam shunday bo‘lgan edilar
Rosululloh sollallohu alayhi vasallam shunday bo‘lgan edilar:
Nabiy sollallohu alayhi vasallamning oxirgi so‘zlari: "Namoz, namoz(ga extiyot bo‘lingiz!) Qo‘l ostingizdagi cho‘rilar haqqida Allohdan qo‘rqingiz!", degan so‘zlar bo‘lgan edi.
***
Xulqlar ichida yolg‘onchilikni juda yomon ko‘rardilar.
***
U zot sollallohu alayhi vasallam uchun eng suyumli amal oz bo‘lsa ham davomli bo‘lgani edi.
***
Nabiy sollallohu alayhi vasallam eng yaxshi, eng saxiy va eng shijoatli inson edilar.
***
Agar odamlarga imomlik qilsalar namozni yengilroq, o‘zlari yolg‘iz o‘qisalar uzunroq o‘qirdilar.
***
Agar yonboshlasalar o‘ng qo‘llarini o‘ng yonoqlari ostiga qo‘yardilar.
***
Agar qazoi-hojat qilmoqchi bo‘lsalar, yerga paslamagunlaricha kiyimlarini ko‘tarmasdilar.
***
Agar biror bir xursandchilik xabari yetsa, Allohga shukr qilgan holda sajdaga yiqilardilar.
***
Agar biron qavmdan xavf qilsalar: "Allohim, ularning qarshisiga biz Seni qo‘ygaymiz va Sendan ularning yomonligidan panoh berishingni so‘raymiz", derdilar.
***
Agar uylariga kirsalar, tishlarini misvoklardilar.
***
Agar biron bir kasalni ko‘rgani borib huzuriga kirsalar: "Hech qisi yo‘q, Alloh xohlasa gunohlardan poklanasan", derdilar.
***
Agar biror bir yoqtirgan narsalarini ko‘rsalar: "Allohga hamdu sano bo‘lsinkim, Uning ne’mat-(tavfiqi) ila solih amallar barkamol bo‘lur", derdilar.
***
Agar mayyitni dafn qilishdan forig‘ bo‘lsalar, qabr oldida turib: "Birodaringiz uchun istig‘for aytingiz va unga sobitqadamlikni so‘rangiz, chunki u xozir so‘ralmoqda", derdilar.
***
Agar ahli oilalaridan biron kishi betob bo‘lib qolsa, unga muavvizot ("Ixlos", "Falaq", "Nos" suralari)ni o‘qib dam solardilar.
***
Agar og‘rib qolsalar, muavvizotni o‘qib, o‘zlariga dam solar va badanlarini mas'h qilardilar.
***
Bolalar va ayollarga o‘ta mehribon edilar.
***
U zot sollallohu alayhi vasallam chimildiqdagi kelinchakdan ham hayoliroq edilar.
***
Eng ko‘p qiladigan duolari: "Robbimiz, bizga dunyoda ham yaxshilik va oxiratda ham yaxshilik ato etgin va bizni do‘zax azobidan asragin!", degan duo edi.
***
Rosululloh sollallohu alayhi vasallam sukuti uzoq, kulgisi oz bo‘lgan zot edilar.
***
Soqollari mo‘l, haybatlari ulkan edi.
***
Tahajjud namozini hech qoldirmasdilar. Agar betob bo‘lsalar, namozni o‘tirib o‘qirdilar.
***
Safarda ham, hazarda ham to‘lin oy kunlarining ro‘zasini qoldirmasdilar.
***
Uxlaganlarida misvok boshlarining oldida turardi, agar uyg‘onsalar tishlarini masvoklardilar.
***
Tahoratlarida, oyoq kiyim kiyishlarida, soch tarashlarida va barcha ishlarida imkon qadar o‘ngdan boshlashni yaxshi ko‘rardilar.
***
Allohni har doim zikr qilardilar.
***
Zuho namozini to‘rt rakaat o‘qir va uni Alloh xohlaganicha ziyoda qilardilar.
***
Hadyani qabul qilar va uni munosib taqdirlardilar.
***
Agar yosh bolalarning oldidan o‘tsalar, ularga salom berardilar.
***
Dushanba va payshanba kunlari ro‘za tutardilar.
© Abudavud Yusuf