Kahf surasining fazilatlari

«Kahf» so‘zi arab tilida g‘or ma’nosini anglatadi. Suradagi asosiy qissa qahramonlari Robbilariga iymon keltirgan yosh yigitlar o‘z zamonlari podshohi zulmidan qochib, iymonlarini saqlash maqsadida bir g‘orga kirib oladilar va o‘sha yerda ilohiy mo‘’jiza sodir bo‘ladi. Suraning nomi ham shundan olingan.

«Kahf» surasi haqida Payg‘ambarimiz sallollohu alayhi vasallamdan bir qancha sahih hadislar rivoyat qilingan.

Baro roziyallohu anhudan rivoyat qilinadi: "Bir kishi Kahf surasini o‘qir edi. Uning oldida ikkita arqonga bog‘langan ot bor edi. Otni bulut o‘rab oldi va bulut aylanib unga yaqinlasha boshladi. Ot esa undan cho‘chib qochdi. Bu veqealarni o‘z ko‘zi bilan ko‘rgan sahobiy bo‘lgan voqeani Rasululloh sallollohu alayhi vasallamga aytib berdi.
Shunda Rasululloh sallollohu alayhi vasallam: «U Qur’on tilovati uchun tushgan sakiynadir (ya’ni, farishtadir)», dedilar". (Buxoriy rivoyati).

Rasululloh sollallohu alayhi vasallam: «Kim «Kahf» surasining oxirgi o‘n oyatini o‘qisa, Dajjol fitnasidan omonda bo‘ladi», deganlar. (Ibn Hibbon rivoyati).

Boshqa bir hadisda: «Kim «Kahf» surasining avvalidan o‘n oyatni yod olsa, Dajjol fitnasidan saqlanadi», deyilgan.
(Muslim rivoyati.)

«Kim jum’a kuni «Kahf» surasini o‘qisa, Alloh taolo u uchun ikki juma oralig‘ida nur beradi». (Alboniy sahih degan).

«Kim jum’a kuni «Kahf» surasini o‘qisa, qadami ostidan nur chiqib, osmoni falakka ko‘tariladi, qiyomat kuni shu nur unga yorug‘lik berib turadi va ikki jum’a oralig‘idagi gunohlari mag‘firat qilinadi». (Munziriy «Targ‘ib va tarhib»).