Oxirat hovlisi silsilasi: O‘LIM (12/12)
Anas roziyallohu anhudan rivoyat qilingan hadisda Rasululloh sollallohu alayhi va sallam aytganlar: «Alloh taolo dedi: Ey Odam bolasi, madomiki sen Menga duo qilib, Mendan umidvor turar ekansan, gunohing qanaqa bo‘lishdan qat’iy nazar, (ularning ko‘pligiga ham) parvo qilmasdan mag‘firat etaman. Ey Odam bolasi, agar gunohing bulutlarga qadar yetsa-da, Mendan istig‘for tilasang, seni mag‘firat etaman. Ey Odam bolasi, agar sen huzurimga yer yuzini qoplaydigan gunohlar bilan kelsang va Menga hech narsani sherik qilmagan holda ro‘baro‘ bo‘lsang, men seni yer yuzini qoplaydigan mag‘firat bilan qarshi olaman!» (Hasan hadis, Sahihul-jomi’: №4338, Termiziy: 2/270).Dunyoga ham harakat qilavering, borliqni obod etishdan qolmang, mol-dunyo va tijoratdan ham yuz o‘girmang, faqat bir shart bilanki, haloldan toping va Alloh jalla va aloning haqqini ado eting.
Men sizni dunyodan yuz o‘girishga chorlamayman, hayotdan umidsizlantirishni ham istamayman. Bor-yo‘g‘i avvalo o‘zimga, keyin esa sizga dunyo oxirat uchun ekinzor ekanini eslatib qo‘yishni istayman. Shunday ekan, foniy hovlini deb boqiylik hovlisidan mahrum bo‘lib qolish yaramaydi. Ertaga barchamiz bu dunyodan ketamiz va Alloh taolo huzuriga qaytamiz. O‘shanda sizga faqat o‘zingiz bilan birga olib kelgan amalingiz foyda beradi.
Rasululloh sollallohu alayhi va sallam aytganlar: «Mayyitga uch narsa – moli, ahli va amali ergashib boradi. So‘ng ikkitasi qaytib ketib, bittasi qoladi. Ahli va moli qaytadi va amali qoladi» (Buxoriy: №6514, Muslim: 2960, Termiziy: №2380).
Qabrga kirarkansiz, hol tili bilan sizga shundoq xitob qilinadi:
Yer bag‘rini tilib, o‘ydilar,
Qabr yasab, seni qo‘ydilar.
Hisob uchun turganing onda
Asqotmagay senga hech banda.
Ha, endi u onda sizga dunyoda qilgan amalingiz-u, Abadiy Barhayot Zotning rahmatidan o‘zga hech narsa naf bermaydi.