Vitr namozi

Savol: Vitr namozi qanday o‘qiladi va u necha rakat?
Javob: Vitr 3 rakat bo‘lib, Huftondan keyin o‘qiladi, undan oldin joiz emas. Kim vitr o‘qimoqchi bo‘lsa namozni boshlash uchun takbir aytadi, so‘ng “Sano” “Taavvuz” “Basmala” “Fotiha” va zam suralarni o‘qiydi. So‘ngra ruku va ikki bor sajda qiladi. Keyin ikkinchi rakatga turadi va boshqa namozlar kabi davom ettiradi. So‘ng o‘tirib tashahhud o‘qiydi va uchinchi rakatga turadi. Unda “Fotiha” va zam sura o‘qiydi va qiroatdan forig‘ bo‘lgach quloqlariga qo‘llarini ko‘tarib takbir aytadi, so‘ng “Qunut” duosini o‘qiydi. “Qunut”ni o‘qib bo‘lgach takbir aytib ruku qiladi va uchinchi rakatni boshqa namozlar kabi tamomlab qo‘yadi.
S: Vitrning har bir rakatida Fotiha va zam sura o‘qiydimi?
J: Ha, har rakatda u ikkisini o‘qiydi.

S: Vitrda sunnatda kelgan qiroat bormi?
J: Ha, birinchi rakatda Fotihadan keyin “A'laa” surasini, ikkinchi rakatda “Kafirun” surasini, uchinchi rakatda esa “Ixlos” surasini o‘qish sunnat hisoblanadi. Ba'zi rivoyatlarda oxirgi rakatda “Ixlos” surasi bilan “Muavvizatayn”ni (Falaq va Nos suralari) qiroat qilish ham vorid bo‘lgan.

S: Qunutni jahriy o‘qiydimi maxfiymi?
J: Imom bo‘lsin, iqtido qiluvchi bo‘lsin yoki yakka o‘quvchi bo‘lsin farqi yo‘q - maxfiy o‘qiydi.

S: Vitr jamoat bilan o‘qiladimi?
J: Ha, vitrni Ramazonning har kechasida taroveh namozidan keyin jamoat bilan o‘qish sunnat.

S: Agar vitrda imomlik qilsa qiroatni jahriy qiladimi?
J: Ha, imom vitrning uchchala rakatida qiroatni jahriy qiladi.

S: Vitrdan boshqa namozda ham “Qunut” o‘qiladimi?
J: Vitrdan boshqa namozda qunut o‘qilmaydi. Faqat, musulmonlarga kulfat yetganda o‘qish joiz, bunda (yani vitrdan boshqa namozda) rukudan keyin tik turganda qunut o‘qiladi, imom musulmonlar foydasiga va kofirlarga qarshi duo qiladi.