Birinchi sevgim sevgi haqida she'r

Manzili yo'q, safarga chiqqan,
Karvon bo'lding, birinchi sevgim.
Sahroda, sarobga yo'liqqan,
Sarbon bo'lding, birinchi sevgim.

Sen adashding, mendan voz kechib,
Vayron bo'lding, birinchi sevgim.
Topolmaysan endi axtarib,
Sarson bo'lding, birinchi sevgim.

Qo'l uzatsam, yetmas qo'llarim,
Osmon bo'lding, birinchi sevgim.

Suratingga termulaman, jim,
Armon bo'lding, birinchi sevgim.

Afsus endi, eskirgan ertak,
Doston bo'lding, birinchi sevgim.
Muhabbati shunchaki ermak,
Yolg'on bo'lding, birinchi sevgim.

Xiyonatning domiga botgan,
Shayton bo'lding, birinchi sevgim.
Mol dunyoga sevgini sotgan,
Arzon bo'lding, birinchi sevgim.

Kuz kelmasdan sarg'ayding, so'lding,
Xazon bo'lding, birinchi sevgim.
Endi yo'qsan, men uchun o'lding,
To'zon bo'lding, birinchi sevgim.

Manzili yo'q, safarga chiqqan,
Karvon bo'lding, birinchi sevgim.
O'z baxtini topmay ovvora,
Sarson bo'lding, birinchi sevgim...