Айриликдан бутун вужуд қалтирайди

Сен кетарсан кўз ёшларинг,юзинг ювиб.
Ёшга тўла нигоҳларинг,жавдирайди.
Сен кетарсан,умидларим қувиб-қувиб.
Айриликдан бутун вужуд қалтирайди.

Сен кетарсан,аламларим эзар мени.
Уксик қалбим фарёд урар ич-ичимда.
Наҳот энди ҳаёлларим излаб сени.
Кўз ёшларим тўла бўлар кулгичимда.

Сен кетарсан,мени ташлаб. мени ташлаб.
Маъюсгина бошинг эгиб оққушгинам.
Сен кетарсан,муҳаббатни кўзин ёшлаб.
Унг бўлмаган, ширингина бир тушгинам.

Бу оламни торайтириб кўзларимга.
Бор шодлигим кетмокдасан,мендан олис.
Ҳеч ким қулок солмас,фарёд- сўзларимга.
Наҳот энди бу дунёда,қолсам ёлғиз.

Сен кетарсан,ҳозирданок соғинаман.
Ёлвораман изларингни силаб-силаб.
Дийдорингга туймоқ учун талпинаман.
Ҳудоимдан олган эдим,тилаб-тилаб.

Термуламан,жавдираган кўзларингга.
қўлим етмас,кўз ёшингни артмоқ учун.
Тушунаман, пичирлаган сўзларингга.
Гард бўлайин,сен-ла бирга кетмоқ учун.

Сен кетарсан,кўз ёшларинг,юзинг ювиб.
Ёшга тўла нигоҳларинг,жавдирайди.
Сен кетарсан, умидларим қувиб- қувиб.
Айриликдан бутун вужуд қалтирайди. . .