Ватан ҳақида сара шеърлар тўплами

ВАТАН — Абдулла Орипов

Агар дўстлар эрур содиқ бир-бирин қийратиб бўлмас,
Агар қилғил неча фитна аларни айратиб бўлмас.
Демишлар: мору қушни бир қафасда асратиб бўлмас,
Ватандан айри кўнгилни билингки, яйратиб бўлмас.
Баайни банди булбулни чамансиз сайратиб бўлмас.

Ватан деб мен баён қилдим, аё дўстлар, мухаммасни,
Ватанни ким улуғ билди, азиз билдим мен ул касни.
Ватан деб жўш урар эрса кўтаргум бошима хасни,
Ватандан айри кўнгилни билингки, яйратиб бўлмас.
Баайни банди булбулни чамансиз сайратиб бўлмас.

Надомат бирла боқғайман ватансизларга ҳар доим,
Эгиб бошини зор йиғлар, агарчи давлати қойим,
Фақир бўлсам-да бор юртим — тожу тахтим, борар жойим.
Ватандан айри кўнгилни билингки, яйратиб бўлмас.
Баайни банди булбулни чамансиз сайратиб бўлмас.

Боболар кечмишин ҳаргиз фаромуш айламанг, дўстлар,
Ҳақиқат тонги отганда ани туш айламанг, дўстлар,
Агар ким эътиқодсиздур, ани хуш айламанг, дўстлар,
Ватандан айри кўнгилни билингки, яйратиб бўлмас.
Баайни банди булбулни чамансиз сайратиб бўлмас.

Диёрим Ўзбекистондур, ки андин ифтихорим бор,
Демакким, ҳур адолатлиғ, давлати барқарорим бор,
Онамдек меҳрибон, мунис Ватан бор, ғамгузорим бор,
Ватандан айри кўнгилни билингки, яйратиб бўлмас.
Баайни банди булбулни чамансиз сайратиб бўлмас.

Ватан, сен ҳур, йўлинг шонли, қадамни ташлагин шахдам,
Фахр-ла боқғай Абдулло, кўзида шодлигидан нам
Паноҳингни тилаб Ҳақдин дилида илтижо ҳар дам,
Ватандан айри кўнгилни билингки, яйратиб бўлмас.
Баайни банди булбулни чамансиз сайратиб бўлмас.

ВАТАНИМ — Муҳаммад Юсуф

Мен дунёни нима қилдим,
О`зинг ёруг` жаҳоним,
О`зим хоқон,
О`зим султон,

Сен тахти Сулаймоним,
Ёлг`изим,
Ягонам дейми,
Топинган кошонам дейми,

О`зинг менинг улуг`лардан
Улуг`имсан, Ватаним…

Шодон куним гул отган сен,
Чечак отган изимга,
Нолон куним юпатган сен,
Юзинг босиб юзимга.

Синглим дейми,
Онам дейми,
Ҳамдарду ҳамхонам дейми,
Офтобдан ҳам о`зинг меҳри –
Илиг`имсан, Ватаним.

Сен Машрабсан,
Халқда тумор,
Балхда дорга осилган,
Навоийсан, шоҳ ёнида

Фақирини дуо қилган.
Яссавийсан, меники деб,
Ко`ринган даъво қилган,
Минг бир ёг`и очилмаган
Қо`риг`имсан, Ватаним.

Сен Ҳо`жандсан,
Чингизларга
Дарвозасин очмаган,
Темур Малик орқасидан

Сирдарёга сакраган,
Муқаннасан қорачиг`и
Оловларга сачраган,
Широқларни ко`рган чо`пон
Чо`лиг`имсан, Ватаним.

Ким Қашқарни қилди макон,
Ким Энасой томонда,
Жалолиддин – Қурдистонда,
Бобуринг – Ҳиндистонда,

Бу қандай юз қаролиг` деб
Ётарлар зимистонда,
Тарқаб кетган то`қсон олти
Уруг`имсан, Ватаним…

О`г`лим десанг осмонларга
Г`ирот бо`либ учгайман,
Чамбил юртда Алпомишга
Навкар бо`либ тушгайман,

Падаркушдан пана қилиб
Улуг`бегинг қучгайман,
Г`ичир-г`ичир тишимдаги
Со`лиг`имсан, Ватаним…
О`тган кунинг – о`тган кундир,

О`з бошингга етган кун,
Қодирийни берган замин,
Қодирийни сотган кун.
Қо`лин бог`лаб,

Дилин дог`лаб,
Етаклашиб кетган кун,
Воҳ болам! деб айтолмаган
Дудуг`имсан, Ватаним.

Ёнингда қон йиг`лаган бир
Шоирингга қараб қо`й,
Гар Қо`қонга ё`линг тушса,
Детдомларни со`раб қо`й.

Ҳеч бо`лмаса Усмон ҳокин
Келтирмоққа яраб қо`й,
Олисларда қуриб қолган
Қудуг`имсан, Ватаним…

Сен – шохлари осмонларга
Тегиб турган чинорим,
Ота десам,
О`глим деб,
Бош эгиб турган чинорим,

Қо`йнимдаги ифтихорим,
Бо`йнимдаги туморим,
О`зинг менинг улуг`лардан
Улуг`имсан, ВАТАНИМ !

ВАТАН — Холдор Вулқон

Сен агар буғдой бошоқ бўлсанг сомонингман, Ватан,
Тоабад бошинг омон бўлсин, товонингман, Ватан.
Барча яхши, барча оқил, барча доно, файласуф,
Қимтиниб бир чеккада юрган ёмонингман, Ватан.

Чор тараф зулмат, туман, увлайди минг -минглаб шоқол,
То саҳар гулхан ёқиб чиққан чўпонингман, Ватан.
Барча жим, тилсиз писиб, мум тишлаганда, хайқириб,
Ҳақ сўзин дор остида айтган забонингман, Ватан.

Бўлмасин оввора ёв ойболта қайраб қатлима,
Қатл этиб ўлдирса хам ўлмас омонингман, Ватан.
Юртда Вулқон чўққидек бошим булутлардан баланд,
Ёв учун мангу ўтиб бўлмас довонингман, Ватан!

ВАТАН — Иқбол Мирзо

Сени десам юрагимда очилар гуллар,
Ёмғир бўлиб самолардан сочилар гуллар,
Саҳролардан, дарёлардан сочилар гуллар,
Юрагимнинг гулисан сен, гуллаган Ватан!

Исминг айтиб уйғонади чучук жилғалар,
Сунбулалар тонгларингдан тақар сирғалар,
Кипригимда ёғдуларинг солар жилвалар,
Тилагимнинг гулисан сен, гуллаган Ватан!

Хушбўй-хушбўй олмаларда жаннат ҳавоси,
Тоғларингнинг бағрида минг дарднинг давоси,
Шудир, ахир, бир инсоннинг умр сафоси,
Юрагимнинг гулисан сен, гуллаган Ватан!

Ҳовуч-ҳовуч, зилол-зилол сувингдан ичдим,
Меҳринг қанот бўлди, мовий кўкларда учдим,
Яна қайтиб сенга келдим, тупроғинг қучдим,
Тилагимнинг гулисан сен, гуллаган Ватан!
Юрагимнинг гулисан сен, гуллаган Ватан!

Ватан деб… — Маҳмуд Тоир

Айтсам, нондек ширин со`з бор дунёда,
Айтсам, жондек ширин со`з бор дунёда.
Ватан деб, шивирлаб айтиб ко`ринг сиз,
Ватан деб, ко`нгилга қайтиб ко`ринг сиз.
Чеҳрангиз балқийди, қуёш бо`ласиз,
Қалбингиз қалқийди, ко`з ёш бо`ласиз.

Онажон, деганда энтиккан дилдек,
Озодсан, деганда яйраган қулдек.
Ватан, деб энтикиб эланиб айтинг,
Ватан, деб вафога беланиб айтинг.
Жон ичра юз очган бир жон бо`ласиз,
Сиз ерга сиг`маган осмон бо`ласиз.

Болангиз қувончи то`килган тупроқ,
Қуёш бир ко`рмаса о`кинган тупроқ.
Жаннатдай муқаддас чаман бо`лади,
Аё до`ст, у бизга Ватан бо`лади.
Ватан, денг ко`нгилнинг ко`зи очилсин,
Ватан, денг сог`инчнинг юзи очилсин.

Ватан алла берган оромдек ширин,
Ватна халқ ко`рсатган икромдек ширин.
Ватан, денг худога юкуниб айтинг,
Асра, денг тиз чо`кинг о`киниб айтинг.
Ватан, деб биз буюк бир халқ бо`ламиз,
Ватан, деб иймонда барҳақ бо`ламиз.

Айтгил дўстим нима қилдик ватан учун — Иқбол Мирзо

Бошинг эгиб таъзим айла, шукрона айт
Сени гулдек эркалаган чаман учун
Осмонларда юрган бўлсанг тупроққа қайт
Айтгил дўстим нима қилдик ватан учун

Кўзи қора, юраги оқ шу эл учун
Тупроқ учун, шу юрт учун, чаман учун
Улуғ инсон бошлаб берган шу йўл учун
Айтгил дўстим нима қилдик ватан учун

Қачонгача қорнинг ўйлаб ўтадурсан
Қачонгача кўкдан чалпак кутадурсан
Ахир ватан битта, сен ҳам биттадурсан
Айтгил дўстим нима қилдик ватан учун

Бунча бино қойманг заррин чопонларга
Саратонда япроқ бўлгин деҳқонларга
Суянгани таёқ болгин чўпонларга
Айтгил дўстим нима қилдик ватан учун?

Ҳеч кимдан кам эмассан, кам бўлмагайсан
Ерда қолсанг қуёш бўлиб кулмагайсан
Қачон белни махкам тортиб боғлагайсан
Айтгил достим нима қилдик ватан учун

Шу сойлардан сувлар ургин юзинга сен
Бир бор назар солгин босган изинга сен
Шу саволни бериб кўргин ўзинга сен
Айтгил дўстим нима қилдик ватан учун

Ватан ҳақида шеър — ОТАБЕК ФОЗИЛЖОНОВ

ҲАР ЖАБҲАДА ДОНГ ТАРАТГАН ДУНЁДА
ХУМОСИ ҲАМ МАҒРУР УЧАР САМОДА
БЕТАКРОРДИР , БЕНАЗИРДИР ЖАМОЛДА
БУ МЕНИНГ ВАТАНИМ ЎЗБЕКИСТОНИМ !!!

ОСМОНЛАРДАН ЮКСАК ЭРУР КАМОЛИ
ҲАМ БОЙ ҲАМ ЗЎР ЁҚИМЛИДИР КАЛОМИ
ҲИЛОЛЛАРДАН ГЎЗАЛРОҚДИР АЁЛИ
БУ МЕНИНГ ВАТАНИМ ЎЗБЕКИСТОНИМ !!!

ОСМОНИДА ПОРЛАБ ТУРАР АХТАРЛАР (ЁРУҒ ЮЛДУЗ)
УДИР МЕНИНГ БАҒРИМДАГИ БОР ЖОНИМ
БУТУН ДУНЁ ҚАРСАК ИЛА МАҚТАРЛАР
БУ МЕНИНГ ВАТАНИМ ЎЗБЕКИСТОНИМ !!!

ҲАР ЕРЛАРИ ГУЛШАНЛАРГА БУРКАНГАН
ЧЎП ҚАДАСАНГ НИҲОЛЛАРГА АЙЛАНГАН
ЎҒЛОНЛАРИ МАРДЛИК УЧУН ЯРАЛГАН
БУ МЕНИНГ ВАТАНИМ ЎЗБЕКИСТОНИМ !!!

ҲЕЧ БИР ГУЛИ БЕҲУДАГА СЎНМАГАН
КИМКИ БОҚСА БУ ЗАМИНГА ТЎЙМАГАН
ВОСИ ЛИКНИ(БАҒРИ КЕНГ) ЕРГА ТАШЛАБ ҚЎЙМАГАН
БУ МЕНИНГ ВАТАНИМ ЎЗБЕКИСТОНИМ !!!

КАБУТАРЛАР ЭРКИН УЧАР ОСМОНДА
ИШЛАРИДАН БУТУН ДУНЁ ҲАЙРОНДА
ГУЛЛАБ БОРАР БАХТИЁРЛИК ҲАР ОНДА
БУ МЕНИНГ ВАТАНИМ ЎЗБЕКИСТОНИМ !!!

БУ МЕНИНГ ВАТАНИМ ЎЗБЕКИСТОНИМ !!!
ТОМРИМДА ОҚЁТГАН ТЎКИЛМАС ҚОНИМ
УЛУҒЛИК , БУЮКЛИК СИЙМОСИ БЎЛГАН
БУ МЕНИНГ ВАТАНИМ ЎЗБЕКИСТОНИМ !!!

ВАТАН — Сирожиддин Саййид

Дил пораси, кўз қораси сен ўзингдирсан,
Менинг кўнглим сен аслида, сен кўзимдирсан.
Томиримда томир ёйган илк сўзимдирсан,
Илк оғриғим, илк ёмғирим, найсоним, Ватан.

Қир устида ёнбошлаган бобом чайласи
Бу дунёда кимларнингдир орзу-ҳаваси.
Димоғимда — юлдуз иси,шабнамлар иси,
Момом экиб кетган кашнич, райҳоним, Ватан.

Қулоқ солсам шивирлагай ҳатто тошларинг,
Ою қуёш, камалаклар кўзу қошларинг.
Бешигимни тебратгандир қалдирғочларинг,
Ою қуёш кўрпа солган айвоним, Ватан.

Бўронлари тулпорларга тунлар ёл бўлган,
Бир ўғлони чинор, бири мажнунтол бўлган.
Темурлари от минганда жаҳон лол бўлган,
Жаҳонларга тимсол шоҳу султоним, Ватан.

Валилардан ибрат сўйлар қадим саҳролар,
Сўнди қанча салтанатлар, қанча туғролар.
Мақбаралар айтсин лекин, айтсин Зуҳролар:
Ер остидан суҳбат айлар ҳануз Кубролар,
Термизийлар бедор ётган қўрғоним, Ватан.

Не тонг эди — изғиринлар заҳрини тотдинг,
Дастурхонда музтар қолди қанду наботинг.
Шаҳидларинг номларидир ҳар бир работинг,
Абадий ёд эрур асли адабиётинг,
Чўлпон, Фитрат, Қодирий ҳам Усмоним, Ватан.

Гард қўнмасин токи сенинг киприкларингга,
Киприкларим киприк қилай кўприкларингга.
Малҳам бўлмоқ учун асрий оғриқларингга
Булутларинг сузиб юрар кўк, қирларингга,
Уйғоқ руҳлар осмонида посбоним, Ватан.

Нақшларинг қутулдилар кишан-бандлардан,
Хатлар олдим юрагимга Нақшбандлардан,
Афросиёб билан тенгдош куй, оҳанглардан.
Шеърларимга ранглар олдим Самарқандлардан,
Гоҳи мовий, гоҳи зангор достоним, Ватан.

Улуғларинг хокини мен юзларга суртай,
Дилимдаги энг муқаддас сўзларга суртай,
Онамдайин азиз нону тузларга суртай.
Озод бўлган оятларин кўзларга суртай,
Ўз юртига қайтиб келган Қуръоним, Ватан.

Мен дунёни не деб айтай? Бу бир кўҳна боғ,
Ўз билганин сайрар бунда ҳар қумри, ҳар зоғ.
Асло сенинг бағирларинг кўрмайин мен доғ,
Юлдузларга осмон бўлган эй нурли тупроқ.
Осмонлари ер-у, ери осмоним, Ватан.

Сўқмоғингда мен бир эпкин ё бир насимман,
Япроқ сенинг, хас бўлсам гар сенинг хасингман.
Жайронларинг кўзларида қолар сўзингман,
Менинг борим сен биландир, йўғим сен билан,
Катта йўлга чиққан улуғ карвоним, Ватан.

ВАТАН ҚЎШИҒИ — Сирожиддин Саййид

Мен Ватанни севаман,
Танда жонимдир Ватан.
Юлдузлари кўзимдир,
Осмонимдир Ватан.

Киприкларим варақлар,
Ой саҳфалар чарақлар.
Тошлари ҳам ярақлар,
Нур баёнимдир Ватан.

Тоғи — Бухорий бобом,
Боғи — баҳорий бобом.
Темур — суворий бобом,
Шоҳжаҳонимдир Ватан.

Нақшин нигор бешигим,
Қуёш очган эшигим.
Отам айтган қўшиғим,
Жонажонимдир Ватан.

Менда кўпдир ҳур ният,
Энг азизи — Ҳуррият.
Шарафинг — абадият
Шараф — шонимдир Ватан.

Доим ёруғдир йўлим,
Бу шерни айтди кўнглим.
Ватан — шукрона синглим,
Онажонимдир Ватан.

ВАТАННИ ЎРГАНИШ — Сирожиддин Саййид

Мен Ватанни ўрганмадим заридан,
Ўрганмадим уни ҳур ё паридан.
Кафтларнинг чизиқлари — хати ҳам
Ажинлари бўлди менинг харитам.

Шу хатларда кўргандим илк Ватанни,
Ўз онамдан ўргандим мен Ватанни.
Меҳрлари қошу кўзлар бўлдилар,
Ою қуёш мисол юзлар бўлдилар.

Жисмим аро улғайдилар, тўлдилар,
Ватан янглиғ улуғ сўзлар бўлдилар.
Қошларининг остларида тургандим,
Мен Ватанни шу кўзлардан ўргандим.

Нокаслардан ўрганмадим мен уни,
Ёт каслардан ўрганмадим мен уни.
Ном, қарзлардан ўргангандим мен уни,
Жон хаслардан ўргангандим мен уни.

Ўзим кийик сўқмоқларда юргандим,
Мен Ватанни сўқмоқлардан ўргандим.
Осмонлари бошим узра огоҳлар,
Гиёҳидан дилга олдим гиёҳлар,

Райҳонларин сиёҳидан сиёҳлар.
Булоқлардан кўзлар олдим, нигоҳлар,
Ўзим ҳам бир чечакларга буркандим,
Мен Ватанни гиёҳлардан ўргандим.

Менга азал азиз бўлган баридан,
Бешигимдан талпинган пайтларимдан,
Умр кўрган ҳар кексаю қаридан,
Меҳнатларин ёдлаб ўсдим бағридан.

Пайкалларин кокиллардай ўргандим,
Мен Ватанни эгатлардан ўргандим.
Ушоқ нонинг қадри минг элга маълум,
Дарс олдим мен сувлар ичган маҳалим.

Булбулларнинг тилларида шу таълим,
Ўзинг устоз, ўзинг мангу муаллим.
Ҳикматлардан қургандим мен Ватанни,
Заҳматлардан ўргандим мен Ватанни.

ВАТАНИМ — Хуршид Даврон

Шундай яшил менинг Ватаним —
Баҳорнинг илк баргидай яшил.
Шундай гўзал менинг Ватаним —
Ватаним гул атридек ёшдир.

Ватан, сенсан бағримга монанд,
Бағрим каби мусаффо, ёруғ.
Сен онамга ўхшайсан, Ватан,
Онам каби табаррук, улуғ.

Шундай ёруғ менинг Ватаним —
‘Мен севаман’ сўзидек ёруғ.

ВАТАН ВА ОСТОНА — Гулжамол Асқарова

Ассалому алайкум! Эй мовий осмон,
Сен менинг муқаддас бешигим Ватан.
Мени порлоқ кунлар чорлаган замон,
Дунёга очилган эшигим — Ватан.

Сен менга азизсан она сутидек,
Гўдаклик йиғимга гувоҳ бўлганим.
Илк бор қадамимни қутлаб, қувониб,
Севгим сирларидан огоҳ бўлганим.

Юрт кезиб соғинсам тупроқ гардини,
Соғинчимдан кўзи ёшланган Ватан.
Менинг юрагимга туташиб йўли,
Менинг остонамдан бошланган Ватан.

Илк бор айтган сўзим дунёга келиб,
Йўлларга кузатган Ўзбекистоним.
Қуёшдек нур сочиб, жилмайиб, кулиб,
Қўлларин узатган Ўзбекистоним.

Онамсан, отамсан, неки улуғ бор,
Сенинг номинг билан айтилар Ватан…
Бу дунёга келиб Сенга келинар
Ва бир куни Сенга қайтилар Ватан.

Менинг илк саломим алик олганим,
Илк бор қадамимни қутлаган макон.
Севги изҳоримдан энтиккан юрак,
Менинг муқаддасим, эй Ўзбекистон.

ВАТАН НАДИР — Ориф Тўхташ

Ватан надир, ватан надир?
Ватан — бешик, ватан — қабр.
Бу дунёга келмог`инг ҳам,
Кетмог`инг ҳам ватандадир.

Киндик қонинг томган тупроқ,
Боболардан қолган тупроқ.
Қон кечилган, жон чекилган,
Алар боис алвон тупроқ.

Ко`зинг очиб ко`рдинг нени,
Ва не мафтун этди сени? —
Ул ватандур, гул ватандур,
Қучог`ига экди сени.

Ватан надир, ватан надир?
Ватан — меҳр, ватан — қадр.
Садоқат ҳам софдиллиги-
Оқ ё`ргак, оқ кафан каби.

У сенга бир содиқ ҳамроҳ,
Меҳри до`стдан мустаҳкамроқ.
Арзигайдур унинг учун —
Юрагингдан тиксанг байроқ!

Ота ватан, она ватан,
Ватанки, бир дона ватан.
Жаҳоним, деб атар бо`лсанг,
Жо айлагил жона, ватан.

Ватан надир, ватан надир,
Бул шундоқким аталмадир —
Жаннат истаб бо`лма гирён,
Асли ризвон ватандадир.

Не топсанг ул баг`ридин топ,
Ватанни о`з атридин топ.
Унинг сог`инч изтиробин,
Бобурнинг шоҳ сатридин топ.

Унга меҳринг сероб бо`лса,
Жонингни тут, керак бо`лса.
О`нг ко`ксингда ватан о`стир,
Чап ко`ксингда юрак бо`лса!