Мени учратгунча

Мени учратгунча
Мендан олдинроқ,
Кимдур бўлганмиди сенинг ёнингда?
Ҳаёлим ўзингда дейсан-у бироқ-
Аввал ким яшаган фикр-у ёдингда...

Мени учратгунча,
Мендан олдинроқ,
Кимдур тутканмиди нозик қўлингни?
Муштоқ-у зор бўлиб қалбида титроқ-
Кутганмиди ҳар кун келар йўлингни...

Мени учратгунча,
Мендан олдинроқ,
Кимгадур тавозе айлаганмидинг?
Латиф ишқи бўлиб қалбингга чироқ-
Ўзингга ёр этиб сайлаганмидинг...

Мени учратгунча,
Мендан олдинроқ,
Муҳаббат шаробин тотканмидинг,
айт?
Кимнидур соғиниб мендан-да кўпроқ-
Тунлар ғам-ғуссага ботканмидинг,
айт...

Мени учратгунча,
Мендан олдинроқ,
Дилда ишқ бахоринг гул очганмиди?
Бахтинг осмонида қуёшдек порлоқ-
Тафтида ёндириб нур сочганмиди...

"Мени учратгунча" -
Оғриқли нечун,
Йўқ, буни ўйлашга қўрқаман ҳайҳот...
Ахир чорак аср яшаб, мен учун,
Сени учратиб сўнг бошланган ҳаёт...
Ҳақиқий ҳаёт...

Мени учратгунча,
Мендан олдинроқ...