Бу тун

Бу тун сенга етмас йўлимдир менинг
Бу тун сенга элтар ёлғиз нажотим.
Минг йилки пиёда кезиб умримни
Сени тушларимдан топдим ҳаётим.

Яшадим кўнглимнинг совуқ бурчида
На баҳор на ёзга қилмай илтифот.
Болишни қучаман кўзимни юмиб:
Шу тушни кўрсайдим энди умрбод.

Бедорлик қийнаса ичаман дори
Манзилим сеҳрли тушлар олами.
Мен уйқу қаърига қулаб тушаман
Бўғзимда кимнингдир аччиқ алами.

Ярим тун… бедорлик туртади мени
Сўнг жаҳл қиламан қалбимга саркаш.
Тонгдан то кечгача топмай ўзимни
Адашиб юраман кунларим чалкаш

Тунларни кутаман йиғлагим келар
Тошдай юрагимни эзади хўрлик.
Занжирбанд титроқлар қувониб кетар
Ахир тушларимда кутмоқда ҳурлик.

Бу тун сенга етмас йўлимдир менинг
Бу тун сенга элтар ёлғиз нажотим…

Дилфуза Бону