Кейин майли гапиринг, майлига кулинг

Ёлгиз аёл қадамин санаб юрганлар
Туҳмат қилиб беҳаё, бузуқ деганлар.
Ғийбатига ҳамиша эслаб турганлар
Беваликни бир кунлик таъмини билинг
Кейин майли гапиринг, майлига кулинг.

Эгани бўғзида тош бўлиб қотар
Саҳарлар ёримас ташвиш уйғотар
Бир оғиз сўзингиз ҳанжардек ботар
Беваликни бир кунлик таъмини билинг
Кейин майли гапиринг, майлига кулинг.

Болалари кўзида мунгли нигоҳ бор
Ота деган сўзни бир айтишга зор.
Барчасига бир ўзин билар айбдор
Беваликни бир кунлик таъмини билинг
Кейин майли гапиринг, майлига кулинг.

Энди кулиб очилмас ота даргоҳи
Кўз ёшлару, дардлари ёлгиз ҳамроҳи
Бирдан кўзга ташланар кичик гуноҳи.
Беваликни бир кунлик таъмини билинг
Кейин майли гапиринг, майлига кулинг.

Ишлаш керак, пул топиш керак Нима қилсин бир ўзи аёлу….эркак
Қадрини кўп топтаманг айламанг эрмак
Беваликни бир кунлик таъмини билинг
Кейин майли гапиринг, майлига кулинг...!