Кўзларингни соғиниб

Вақт ўтарми ёки бахт,
Армонлардан оғриниб.
Юрагимда йиғлар ахд,
Кўзларингни соғиниб...

Соддамидим, ғўрмидим,
Ё ғурури зўрмидим?!
Эшик чертиб бормадим,
Кўзларингни соғиниб...

Хижрон—сўқмоқ сўнги йўқ,
Армон тушдир, ўнгги йўқ.
Мажнунингман тенгги йўқ,
Кўзларингни соғиниб...

Тақдир, асли тумандир,
Ёзуғи ҳам гумондир,
Сарсон юрмоқ ёмондир,
Кўзларингни соғиниб...

Айтдинг, охир “Бари хал,
Айрилиққа етди гал”.
Нетай, дил сенга мақтал
Кўзларингни соғиниб...

Кўзингга тўймай кўзим,
Бўғзимда қолди сўзим.
Бугун Соғинчман ўзим,
Кўзларингни соғиниб...