Отажоним розимисиз қизингиздан

Кўзингизни олиб қочманг, жоним отам,
Айланайин йиғлаётган кўзингиздан.
Кўз ёшлари куз селидек оқаётган,
Саждагохим розимисиз қизингиздан.

Қизим дея минг бор ўлиб минг тирилиб,
Қайғу алам қўним топган юзингиздан.
Остонадан ўтолмайин йиғлаётган,
Қиблагохим розимисиз қизингиздан.

Болалигим йиғлаяпти кўз ёшимдек,
Минг айланиб ўргилайин ўзингиздан.
Паранжида кўз ёшларин ичаётган,
Панохгохим розимисиз қизингиздан.

Ор номуси, хаё ибо залворини,
Олаяпти қисмат бугун элкангиздан.
Нон тузингиз оқлаш учун кетаётган,
Отажоним розимисиз қизингиздан.

Палохмоннинг тоши каби отилдим- а,
Қизлик билан ҳайрлашиб уйингиздан.
Эркалигим кўмиб кетар кўзингизга,
Шохсуворим розимисиз қизингиздан.

Йўқлаб туринг келолмасам мехрибоним,
Йироқдаман энди ширин сўзингиздан.
Уйингизга мехмон бўлиб келадиган,
Бузрукворим розимисиз қизингиздан.