....ОНАМГА...

....ОНАМГА...
Соғинчимни айтай десам, сўз қолмади,
Йиғлай десам дарёси бор, кўз қолмади.
Бағр нима билмай қолдим Онажоним,
Бағрим куйиб ёнай десам, ўт қолмади !

Умр ўзин карвонида ўтиб борар,
Аммо сизсиз, дунё гўё чўкиб борар.
Кулиб турган чехрангизни Онажоним,
Тополмайин йўқлик мени ютиб борар !

Охларимни ёзаверсам қалам йиғлар,
Сизсизликка қасд қилгандек, алам йиғлар.
Ҳовлидаги райҳонлар хам Онажоним,
Чаккангизга тақилмасдан титраб йиғлар !

Оппоқ рўмол таҳланганча қолиб кетди,
"Болам", деган сўзларингиз қолиб кетди.
Осмон қолди, замин қолди Онажоним,
Энди дийдор, қиёматда қолиб кетди !

Борай десам вақт этагим ушлаб турар,
Бу дунёда рисқ, насиба ушлаб турар.
Икки дунё келишолмай Онажоним,
Сизни унда, мени бунда ушлаб турар !

Бир кун дийдор насиб бўлар, ишончим бор,
Бағрингизга бош қўйгани, умидим бор.
Сизни бирам соғинганман Онажоним,
Сизга қанча айтолмаган гапларим бор !

Пичирлайман ўз-ўзимга недур сўзлаб,
Қўлларимда суратингиз турар бўзлаб.
Шу бир парча қоғоз билан Онажоним,
То тонггача дардлашаман сизни излаб!