РАМАЗОННИ СОҒИНГАНЛАР

Аллох ризосинга зорман,
Гунохим бисёр иқрорман.
Орангизда мен ҳам борман,
Рамазонни соғинганлар.

Берсаларда тилло кўза,
Ичмай шароб, тотмай бўза.
Нақадар баҳт тутмоқ рўза,
Рамазонни соғинганлар.

Виждон менга берур танбех:
Шеърга излайвермай ташбех.
Дер зикр қил айтгил тасбех,
Рамазонни соғинганлар.

Бизга насиб этмай тақдир,
Ўтди жанглар, Уҳуд, Бадр,
Лек насиб Лайлат-ул Қадр,
Рамазонни соғинганлар.

Лаънатланмиш дунё дашти,
Сўнмас мўминларнинг шашти.
Таровехнинг бордир гашти,
Рамазонни соғинганлар.

Ўрганмишман бедорликка,
Қалб маҳкумммас беморликка,
Чорлаюрман ифторликка,
Рамазонни соғинганлар.

Нобакордир тўкмагин тер,
Рўза тутма, сафо қил дер.
Э йўқ ризқин жаннатда эр,
Рамазонни соғинганлар.

Роббим Аллох, диним Ислом,
Мухаммад Алайхиссалом-
Расулим эрур дер мудом,
Рамазонни соғинганлар.

Умар ибн Ҳаттоб каби,
Саҳийдирлар офтоб каби,
Аллохгадир ошиқ қалби,
Рамазонни соғинганлар.

Саждага теккандир боши,
Жаннатийлар қариндоши.
Салмон Форсийнинг диндоши,
Рамазонни соғинганлар.

Ўқиб намоз, ўқиб Қуръон,
Дарра урган мисол саксон,
Қилур лаъин макрин яксон,
Рамазонни соғинганлар.

Ғафлат гулин сўлдиражак,
Нафс қутқусин ўлдиражак,
Аллох уйин тўлдиражак,
Рамазонни соғинганлар.

Ажал камонидан дайди,
Бир кун бизга ўқ қадайди.
Кун эмас, соат санайди
Рамазонни соғинганлар.

Бор бўларларлар ҳар онида,
Ўн бир ойнинг султонида.
Рўзадорлар карвонида,
Рамазонни соғинганлар.