РАМАЗОН БАРОКАТИ

РАМАЗОН БАРОКАТИ

Рамазон рўзасининг хайратлантирувчи жихатлари мудом мени тафаккурга бошлайди. Аслида бу фазилатларни кўпчилик билади, аммо мен яна бир бор эслатишни маъқул кўрдим.

Рўза рўзадор учун нихоятда завқли, рохатбаҳш ибодатдир. Рўзадор рухий халоват ичида бўлади. Чунки ўзини йўқдан бор қилган Аллох азза ва жаалланинг буйруғига итоат қилишнинг баҳтиёрлигини хис қилади. Шунинг учун хам рўза рўзадорга рохат ва халоват бағишлайди. Рўзанинг ортиқча вазн ва касалликка доир пархезлардан мухим фарқи борки, уни фақат ва фақат хидоятга мушарраф бўлганларгина тушунадилар. Рўзадор қалбидаги Аллохнинг розилигига муваффақ бўлиш истаги уни ҳушнуд ва масъуд қилади.

Рўзадорнинг очликни хис қилмаслиги чиндан хам қизиқ. Холсиз бўлади, ланжлик хис қилади, лекин иштахаси бўлмайди. Рўзадорлигимда, сахарликка бир пиёла сув ичиб оғиз ёпган бўлсам-да, иштахани қитиқловчи ис таратаётган тамаддиҳоналар ёнидан ўтиб кетаётиб, очликни хис қилмаслигимни ўйлаб кўп мулохазага толаман. Холбуки, Рамазондан бошқа кунларда қорним тўқ бўлса-да, нафсим мудом яҳши нарсалар истагида бўлади. Чунки очлик миядан келадиган буйруққа боғлиқ ва Рамазонда мўминнинг миясини иймони бошқаради, “Ўзингни тут!” дея нафсига хукм этади.

Рўза — мутлоқ очлик эмас. Рўзадаги очлик ва ташналик маълум вақтлар учун. Рўзадор сахар ва ифторда тановвул қилган озуқалардан ўзига керак бўлган протеин ва витаминларни қабул қилади. Рўзадорларда кам овқатланиш юзага келмайди. Кундалик фаолиятларини шу йўналишда давом эттира олади. Инсон организми фаолиятига хеч қандай салбий таъсир бўлмайди.

Рўзадорлигимизда моддалар алмашинуви давом этади. Четдан озуқа келмагани учун тана ўз моддаларини, тўқима ва хужайраларини ва айниқса меъёрдан ошиқча ёғларни сарфлаб, хазм жараёнини давом эттиради. Аммо тана бу ишни тўғридан тўғри бажармайди. Аввал касал, қари ва ўлик хужайраларни йўқотади. Бу эса вужудимизнинг ёшариши, янгиланиши ва қон янгиланишига сабаб бўлади. Шунинг учун хам Пайғамбаримиз соллаллоху алайхи вассалам “Рўза тутинг, сиххат топасиз” дея мархамат қилганлар.

Рўзадорликда мия захира моддалардан фойдаланиб бир маромда ишлашда давом этади. Инсонда ақлий қобилият этишмаслиги каби нуқсонлар кузатилмайди. Аксинча, кундалик стресслар камайгани учун фикрлаш қобилияти ортади.

Рўза вужудимизни ортиқча ва кераксиз моддалардан тозалаганидек, ўзлигимизни хам маънавий зарарлардан поклайди, рухимизга қўнган дунё ғуборларини аритади.

Аллох хар бир мўмин ва мўминани Ўзи фарз қилган Рамазон рўзасини мукаммал тутишга қодир қилсин! Ибодатларда бизга қувват ва рағбат ато этсин! Гунохларимизни мағфират қилиб, бир ойлик мусулмонларни икки дунёлик мусулмонларга айлантирсин! Амийн!