Шоҳруҳхон феат. Нилуфар Усмонова - Барча шодлик

Барча шодлик сенга бўлсин,
Бор ситам, зорлик менга.
Барча дилдорлик сенга-ю,
Барча хуморлик менга.
Сен менинг жонимни олгин,
Мен сенинг дардинг олай.
Барча соғлик сенга бўлсин,
Барча беморлик менга.
Сенга бўлсин барча ҳусну,
Менга бўлсин барча ишқ.
Кори хунхорлик менга-ю,
Меҳри пойдорлик менга.
Бу жаҳоннинг роҳатин ол,
Бор азобин бер менга.
Сенга бўлсин барча ором,
Барча бедорлик менга.
Ол ўзинг кошоналарни,
Менга қўй майхонани.
Барча хушёрлик сенга-ю,
Барча хуморлик менга.
Майли остонангда ётсам,
Майли қувсанг тош отиб.
Бор дилозорлик сенга-ю,
Бор дилафгорлик менга.
Сен шаҳаншохликни олгин,
Менга қуллик бўлса бас.
Бор жафокорлик сенга-ю,
Бор вафодорлик менга.
Сенга бўлсин нурли кундуз,
Менга қолсин қора тун.
Барча гулшан сенга бўлсин,
Бор тиканзорлик менга.