Баҳиллик ҳорлик келтиради

Хикоя қилинишича, эр ва ҳотин товуқ гўштидан тайёрланган таомни еб ўтиришганда, тўсатдан эшик тақиллаб қолибди. Иштахасини бузиб, бемаврид эшикни қоққан кишидан жаҳли чиққан ҳонадон сохиби эшик қоққан кишини койиб, қувиб юборди. Кунлар ўта бошлади, халиги кишининг турмуши кун сайин қийинлаша борди, кўп ўтмай бор бойлигидан ажралиб қолди. Хатто, ейишга таом хам тополмай, оҳир оқибат аёли билан ажрашиш даражасигача етиб борди. Аёли бошқа кишига турмушга чиқиб кетди.

Кунларнинг бирида, аёл турмуш ўртоғи билан собиқ турмуш ўртоғи сингари пиширилган товуқ гўштидан истеъмол қилиб турганда, бир киши эшикни тақиллатди. Шунда ҳонадон сохиби келган сўровчига таомни бериб юборишини аёлига буюрди. Аёл уйдан ташқарига чиқиб, сўровчига таомни берди ва таажжубда қолди, чунки сўровчи ўзининг биринчи турмуш ўртоғи эди.

Сўнгра, аёл йиғлаган холда қайтиб келди. Ундан турмуш ўртоғи йиғисининг сабабини сўраганида, аёл тиламчи унинг биринчи турмуш ўртоғи эканини ва у билан турмушида ҳудди шундай воқеа содир бўлганида, тиламчини койиб, қувиб солганини айтиб берди. Шунда эри аёлига қараб, нимага таажжубланасан, Аллох номи билан қасам ичаманки, мен эринг хайдаб солган тиламчи бўламан.

Қиссадан хисса шуки, саҳоват сохиби иззат-хурматда ва баҳиллик сохиби ҳор бўлур. Хазрат Али каррамоллоху важхаху айтганларидек, «Бойлик эхсон қилинса – иззат, беркитилса ҳорлик келтиради».