Ажаб соҳир туюлмоқда бу дамлар

Ажаб соҳир туюлмоқда бу дамлар,
Ҳайқириб куйлайди ҳатто тошгача.
Нечун бепарвосиз ахир, одамлар,
Бу тун ўзгачадир, тамом бошқача!

Боқаман олисга нигоҳим санчиб,
Осмон чаманини қуршар оқ гуллар.
Кун бўйи сершовқин шаҳар ҳам тинчиб,
Бироз мизғиш учун чўзилар йўллар.

Бу кеч кўнгил қуши яна сайради,
Тун ҳам қуллуқ айтар табрикларимга.
Уйқудаги гўзал дунё ҳайрати
Илиниб қолади киприкларимга.