Қизил балиқли блинчик

Мўжизавий таъмга эга блинчик! Ажойиб газак ва енгил тамадди ўрнини эгаллаши турган гап. Тайёрланиши оддий, натижаси эса дастурхон даврасида барчани лол қолдиради. Ушбу ретсептни албатта тайёрланг!

Керакли масаллиқлар:

• 4 дона тухум
• 50 грамм шакар, 5 грамм туз
• 200 грамм ун
• 500 мл сут
• 100 грамм ўсимлик ёғи
• 100 грамм филаделфия пишлоғи
• 20 грамм сметана
• 3 грамм лимон шарбати
• 10 грамм укроп
• 100 грамм семга балиғи ёки бошқа турдаги қизил балиқ гўшти

Тайёрлаш усули:
1. Тухумни туз ва шакар билан кўпиртиринг. Сутни қуйинг. Унни солинг. Бир хил масса ҳосил бўлгунча аралаштиринг.
2. Тайёр хамирни ситодан ўтказинг.
3. Ўсимлик ёғини қуйинг ва венчик ёрдамида аралаштиринг.
4. Блинчикни қиздириб, ёғ суртилган товада пишириб олинг.
5. Блинчик асосини тайёрланг. Пишлоқ ва сметанани бирлаштиринг. Майда тўрғалган кўкат ва лимон шарбатини солиб аралаштиринг.
6. Блинчикнинг бир қисмини сарёғ билан суртинг, пишлоқли массадан солинг. Юпқа кесилган балиқ гўшти бўлагини қўйинг.
7. Блинчикни рулет шаклида ўранг.
8. Блинчик рулетини икки қисмга бўлинг. Кўкат билан безатинг. Нозик ва мазали блинчикни дастурхонга тортинг.Ёқимли иштаха!