Дунё чаппасига айланиб кетди узбекча шеър

... Дунё чаппасига айланиб кетди,
Жарга қулаб тушди баланд қоялар...
Бугун тараққиёт чўққига етди,
Жавлон урмоқдалар "эркак" доялар...

.. Хурлик истадилар, нафсга бериб эрк,
Сочилган симобдай учди хаёллар...

Эркаклар либоси бўғзигача берк,
Ярим очиб қўйди кўксин аёллар...

... Аёл аёл бўлсин, эркаклар эркак,
Қайдан учиб келди қизил қарғалар..?
Уларнинг исмини ким дейиш керак..?
Эркак қулогига тақса сирғалар...

... Расадхона қуриб, юлдуз кўрганлар,
Илмни дунёга ўраб қўйишди...
Кеча қўзиқорин териб юрганлар,
Илмла дунёни сўраб қўйишди...

... Товуқ бошқармоқда катакни энди,
Тухум босиб қолди дакан хўрозлар...
Ўпка эгаллади юракни энди,
Обрў топиб қолди масхарабозлар...

... Ҳаёли бўлганни қилишди уят,
Ҳалол яшаганни дейишди "қолоқ" ...
Тарк этиб кетди-ю дилларни оят,
Энди тарвуз эксам чиқар ошқовоқ...

... Эй шоир, шошилма... Тўхтагин бир пас,
Бунча ғам-ғуссани кўтармас юрак...
Хамма ўқисин деб қоғозга эмас,
Шеърларни осмонга ёзишинг керак...