Buncha yiroqdasan mohim sogʻinib

Buncha yiroqdasan mohim sogʻinib,
Hajringda yuragim kuyib bormoqda.
Visolingni koʻrmoq istagan koʻzga,
Achchiq alam yoshi toʻlib bormoqda.

Asli sen yiroqmas, jonimday yaqin.
Koʻzim gavharida avaylaganim.
Lekin yetolmasman, koʻrolmasman hech,
Fojiam kunda bir koʻrolmaganim.

Hozir ham yonimda, hayotimdasan,
Sezyapman qoʻllaring guldayin nafis.
Eng yaqin sogʻinchim, eng olis baxtim,
Yuragim tubida yigʻlayotgan qiz!