Sensiz bahorlarim kuzlanib qoldi

Qarogʻimga sigʻmas mehr degan his,
Otash tigʻla qalbim muzlanib qoldi.
Kesishmas yoʻllarda qoldik ikkimiz,
Sensiz bahorlarim kuzlanib qoldi.

Umid-qanotlari qirqilgan qushdek,
koʻzyoshlar dardimni aritolmaydi.
Oʻn beshi qorongʻu qolgan oymi, ishq-
Koʻngil uylarini yoritolmaydi.

Shabnam-balki yurak toʻkayotgan yosh,
Baxtimga ne boʻldi koʻzlandimi u ?
Koʻzyoshlarda qotib qolganday quyosh,
Sen uning taftini izlamadingmi?

Oʻtli tuygʻulardan qolgani kuldir,
Taqdir roʻyolarga yuzlanib qoldi.
Ketma...nastarinning boʻylarin keltir,
Sensiz bahorlarim kuzlanib qoldi.