Ayolni hoʻrlamang, ayol-bu ona

Ayolni ranjitmang, ayolni soʻkmang,
Bexuda qiynamang, koʻz yoshin toʻkmang,
Ayolsiz koshonalar goʻyo vayrona,
Ayolni hoʻrlamang, ayol-bu ona!

Ayolni izzatu nafsiga tegmang,
Toki erkaklardan qolmasin koʻngil,
Nomusin toptamang, boshini egmang,
Ayol opamizdir, ayol- bu singil!

Gaplarimiz botib pichoq tigʻidek,
Qalbida qolmasin dogʻu izimiz,
Ayolni asraylik koʻz qorachigʻidek,
Ayol kelinimiz, ayol qizimiz.

Ayolni asraylik qadriga etib,
Ayol yorimizdir, vafodorimiz,
Ayol onamizdir, mehribonimiz,
Ayol nomusimiz, ayol orimiz.