Ишга кечикмасликнинг 6 қоидаси
Ҳар бир киши хоҳ давлат корхонасида бўлсин, хоҳ ҳусусий ишхонада ишласин, ишга кечикиб бориб, бошлиғидан дакки эшитишни истамайди. Лекин баъзида ўзимиз истамаган ҳолда ишга кечикиб қоламиз. Бироқ баъзилар деярли ҳар доим кечикишни канда қилмайдилар. Шундай кезларда кечикмаслик учун нималар қилиш керак? Бу саволда 6 та қоида орқали жавоб берамиз.
1-қоида
Энг аввало ярим кечагача телевизор кўрмасликни тавсия қилган бўлардик. Чунки ярим тунгача телевизор қаршисида ўтирган киши барвақт туролмаслиги табиий. Кечаси бериладиган филмлар ёки теледастурлар кўпинча дам олиш кунлари такроран намойиш этилади. Демак, сиз ўша кўрмоқчи бўлган теледастур ёки филмни дам олиш куни ҳам бемалол томоша қила олишингиз мумкин. Фақат бунинг учун дам олиш кунларидаги режангизга буни киритиб қўйсангиз бас.
2-қоидаЁдингиздами, мактабга борадиган пайтингизда ота-онангиз мактабга тутадиган портфелингизни кечқурун тайёрлаб қўйишга мажбур қилишарди. Сиз бугунги кунда ҳам шу ишни такрорлашингиз мумкин, фақат мактаб сумкаси ўрнига эртанги ишга кийиб борадиган кийим кечакларингиз ва сизга яна керак бўладиган бошқа буюмларни дахлизга тайёрлаб қўйинг. Уйқуга ётишингиздан аввалроқ уларни тайёрлаб қўйсангиз, эрталабки 15-20 дақиқа вақтингизни тежаган бўласиз.
3-қоидаЭрталаблари сиз ишга бориш тараддудига қанча кам вақт ажратсангиз, шунча кўп ҳотиржам бўласиз. Бир ўйлаб кўринг, эрталаб ишга кийиладиган кийим ёки бошқа нарсани қидириб, ишга кечикаётганингизни сезиб турсангиз кўпроқ асабийлашасиз. Бу эса яқинларингизга ҳам таъсир ўтказмай қолмайди. Эрталабдан оила аъзоларингизни асабларини бузмасдан, аксинча улар билан бир пиёла чой устида ширин суҳбат қуришга нима етсин!
4-қоидаЁтоғингизда гимнастика қилишга ўрганинг. Қандай қилиб дейсизми? Яхшилаб керишинг, белингизни бир неча марта букинг, қўл-оёқларингизни тепага кўтариб яна пастга туширинг, энг сўнгги босқичда қулоқларингизни уқаланг. Бундан муолажалар сизни уйқу ҳолатидан тезда ўзингизга келишга, шунингдек организмдаги қон айланиши яхшиланишида катта кўмак беради.
5-қоидаЭрталаб уйғонганингиз билан деразани очиб, хонангизнинг ҳавосини алмаштиринг. Бу усул ҳам инсонни уйқусирамасликка давъат этади. Юзингизни эса совуқ сув билан ювишни маслаҳат берамиз.
6-қоидаАгар сиз жамоат транспортидан фойдалансангиз, унда уйингиздан 30-40 дақиқа аввалроқ чиқишга ҳаракат қилинг. Сабаби, автобус ёки бошқа жамоат транспортлари баъзан белгиланган вақтдан эртароқ ёки кечроқ келиши мумкин.
Ишингиз орқали бойиб кетишни истасангиз, ишга ҳаммадан эрта келиб, ҳаммадан кеч кетиш керак, дейишади машхур миллионерлар. Мабодо сиз бундай йўлни истамасангиз, ишга вақтида келишни ўрганинг.Америкалик тадқиқотчиларнинг дунё бўйлаб олиб борган тадқиқотларида, маълум бўлишича, ишга кечикувчилар орасида ёшлар кўпчиликни ташкил этаркан, 50 ёш ва ундан катталар орасида бу ҳолат кам учрар экан. Демак, ёши улғайгани сари инсон ўз иш жойига масулият билан қарар экан.
