Беҳи мевасининг фойдали ҳусусиятлари ҳамда косметологиядаги ўрни ҳақида

Мавсумий мевалардан бири бўлган беҳини барчамиз севиб истеъмол қиламиз. Ундан тайёрланадиган мураббою, шарбатлар қишда заифлашган организм учун дармондори бўлиши ҳам рост. Ушбу ажойиб мевадан халқ табобати ва косметологиядан ҳам фойдаланиш мумкин.

Битта беҳини иккига бўлиб, уруғидан ажратинг. Алоҳида идишда 100-150 гр сув билан аралаштириб, оловга қўйинг. Ўртача оловда қуюқроқ кўринишга келгунича қайнатинг. Сўнг оловдан олиб, илиқ ҳолатда 1ош қошиқдан кунига 3 махал овқатдан олдин ичишингиз мумкин. Ҳар кунга дамлама янгидан тайёрланади. Қуруқ йўтал, бронхлар шамоллашида тавсия этилади.
Камқонликка қарши
Ўртача катталикдаги беҳини уруғидан тозалаб, 2 чойқошиқ асал билан тўлдиринг. Сўнг 15 дақиқага газ печига қўйиб, юмшатиб пиширинг. Асалли беҳини бир кунда бир маротаба истеъмол қилиш кифоя. Камқонлик, ҳазм қилиш фаолияти билан боғлиқ муаммоларда асқотади.

Буйрак безовта қилса
Беҳи мевасининг бир ошқошиқ қуритилган барги ва шунча миқдорда тозаланган уруғини 200 мл қайнаган субга дамлаб, оловга қўйинг. 5-6 дақиқа ўртача оловда қайнагач, тагини ўчинг-да, бироз совутинг. Таъбга кўра асал билан аралаштириб, 1 ошқошиқдан кунига 3-4 маҳал қабул қилинг. Бу дамлама пешоб ҳайдовчи ҳусусиятга эга.
Иммунитет оқсаганда
3 та беҳи мевасини тоғраб, шарбациққичдан ўтказинг.Таъбга кўра асал билан аралаштириб, оз-оздан кун давомида қабул қилинг. Асал қўшилган беҳи шарбати қабзиятни олдини олишда фойдали бўлиб, иммунитетни мустахкамлашга ёрдам беради.
Тиститга даво
Агар сизни тистит қийнаётган бўлса, кунига 50-80 гр янги сиқилган беҳи шарбатини истеъмол қилинг. Таркибидаги фойдали моддалар пешоб ажралишини яхшиласа, бактерияларга қарши ҳусусияти касалликда кўмакчи воситадир.
Асабийлашганда
Бир ҳафта давомида мана бу усулга риоя қилишингиз мумкин: ҳар тановулдан сўнг асал билан буғда тайёрланган яримта беҳи бўлагини истеъмол қилинг. Агар асалга аллергиянгиз бўлса, 1 ошқошиқ беҳи мураббоси билан аралаштириш мумкин. Мева таркибидаги фойдали ҳусусиятларга кўра асабни тинчлантиришга ёрдам беради.
Иштаха йўқ бўлса
Кун ора яримта беҳи мевасини озроқ сариёғ ва таъбга кўра асал билан буғда тайёрлаб, асосий тановулдан сўнг десерт сифатида истеъмол қилинг. Беҳининг бу кўринишда истеъмол қилиниши иштахани яхшилаб, ширинлик ўрнини боса олади.
Диққат қилинг!
Беҳи меваси таркибида ошловчи моддалар бўлгани боис ич кетиши ҳолатлари, тез-тез ич бузилишларига мойиллиги борлар, шунингдек кичик ёшдаги болалар учун хомлигича ейиш тавсия этилмайди. Озроқ асал ёки сариёғ билан буғда ёки газ печида пиширилган кўринишда оз-оздан истеъмол қилиш керак.
Косметологияда
Беҳининг бир бўлагини қирғичдан ўтказиб, ҳосил бўлган шарбати билан юз терисини артинг-да, 15 дақиқадан сўнг илиқ сувда чайинг. Бу мевали лосён ёғли юз терисида ёғлашишни олдини олади.

Қирғичдан чиқарилган беҳи бўтқасидан юзга ҳуснбузарлар тошишида фойдаланиш мумкин. Бунинг учун мева бўтқасини намланган юз терисига текис суртиб, 15 дақиқадан сўнг илиқ сувда чайилади.
Беҳи уруғини 100 гр қайнаган сувга дамлаб 5 дақиқа давомида чайқатиб туринг. Сўнг аралашмани докадан ўтказиб, қуёшда қорайган ёки қизарган тери юзасини енгил артишингиз мумкин. Ҳусусиятига кўра беҳи уруғидан тайёрланган аралашма терини оқартириб, меъёрий ҳолатини тиклайди.

Бир дона тухум оқини кўпиртириб, тенг миқдорда беҳи шарбати, одеколон ва камфара спирти билан аралаштириб, юз териси артилади.15 дақиқадан сўнг илиқ сувда чайилади. Бундай ниқоб юз терисини оқартириш ва турли ҳарактерли тошмалардан холи этишда қўлланилади.
Беҳи чўпи
Беҳи дарахтининг тозаланган чўпларига ғошт қиймасидан лўла кабобларни ясаб, ўсимлик ёғида қовуринг. Сўнг арчилган сабзавотлар билан қозонга териб, димланг. Бундай усулда тайёрланган лўла кабоб беҳининг ўзига хос таъми билан бирлашиб, таомингиз янада ҳушхўр ва мазали бўлади.