Дубайнинг энг машхур ва чиройли жойлари

Ушбу бетакрор шаҳар ҳақида жуда кўп бор эшитганингиз аниқ. Унинг ўзига ҳос кўриниши бутун дунё сайёҳларини гул шираси каби ўзи томон тортиб туради. Шу сабабли ҳам бугунги мақоламизни айнан мана шу мўжизавий шаҳарга бағишлаш ниятидамиз.

Бурж ал-Халифа
Бурж ал-Халифа – дунёдаги энг баланд бино, ўзига ҳос архитектура ва дизайн билан безак берилган иншоот. Ушбу бино баландлиги 828 метрга тенг бўлиб, ундаги қаватлар сони 163 тани ташкил қилади. Қизиғи шундаки, у оддий биногина эмас, Дубай ичидаги кичик шахар ҳамдир. Ушбу бино ичида меҳмонхоналар, замонавий офислар ва томоша майдонлари жойлашган.
Бурж ал-Араб меҳмонхонаси
Мазкур иншоотни дунёдаги энг ажойиб меҳмонхона дея ҳақли равишда эътироф этиш мумкин. У елкан кўринишига эга бўлиб, Дубай соҳилларидан ўрин олган. “Бурж ал-Араб” номи “Араб минораси” деган маънони англатади. Баландлиги 300 метрга тенг бўлган меҳмонхона ҳақиқатдан ҳам олий мақтовларга арзийди.

Дубай савдо фестивали
Дубай савдо фестивали- шопоголик инсонлар учун асл тантана бўлиб, дунёнинг турли бурчакларидан келган меҳмонларга Дубаи Эвентс анд Промотионс компанияси томонидан тақдим этилади. Савдо фестивали 1996 йилдан бери ўтказиб келинмоқда. Аввалига унинг асосий мақсади Дубайга туристларни кўпроқ жалб қилиш эди ҳолос. Натижа кутилганидан ҳам аълороқ бўлди, бу эса байрам ташкилотчиларини янгиликлар томон илҳомлантириб юборди.
"Wild Wadi" аквапарки
Дубай шаҳрида жойлашган мазкур аквопарк ҳудуддаги энг ажойиб кўнгилочар масканлардан бири ҳисобланади. Бу ердаги аттраксионлар инсонни ҳайратга солиш даражасида, шундай эканки шаҳар меҳмони бўлсангиз, бу ерга ҳам келиб кўриш ёдингиздан чиқмасин.
Дубай аквариуми
Бу дунёдаги энг катта аквариумлардан бири. Уни “Дубай” савдо комплекси ичида учратиш ва сув ости оламининг барча гўзалликларидан бахраманд бўлиш мумкин. Аквариумда 33 минг турли жониворлар истиқомат қилади. Улар орасида акула ва скатлар ҳам мавжуд.
Дубай олтин бозори
Бу БААнинг энг катта бозорларидан бири. Ушбу ҳудуддан ўзингиз истаган ҳар қандай кўринишдаги тилла буюмларни топа олишингиз кафолатланади. Бундан ташқари, мазкур маскан бутун мамлакатдаги энг қадимий бозор ҳамдир. Сайёҳлар эса заргарлик буюмларининг кенг танлови билан бир қаторда арзон нархлар сабаб ҳам олтин бозорига ёпирилиб келишади.
Палма Жумейра
Палма Жумейра- машҳур сунъий орол бўлиб, ташқи томондан қараганда палма дарахти кўринишида қилиб ишланган. Қизиғи шундаки уни дунёнинг саккизинчи мўжизаси сифатида эътироф этишади.
Дубай дастурхони
Бу ерлик инсонлар егуликлар орасида ширинликларни жуда яхши кўришади. Гарчи шаҳарда турли мамлакат ширинликларини тайёрловчи тамаддихоналар сон-саноқсиз бўлса ҳам маҳаллий аҳоли вакиллари орасида ёнғоқли, қуруқ мевали, асалли ширнликлар жуда кенг тарқалган. Сайёҳлар умм али пудинглари, махалабия, хандонпистали пахлава, шарбат, эшасая пишлоқли пироги, хурмо ва бодом бирлашмаси, лукум каби ширнликлардан бажонидил татиб кўришади. Ушбу ширинликларни яқинларингиз учун туҳфа сифатида ўзингиз билан бирга олиб кетишингиз ҳам мумкин.
Ишониш қийин бўлган фактлар!
Дубайда инсонлар йиртқич жониворларни уй ҳайвони сифатида боқишади. Айтишларича бу ўзига ҳос ҳашамат белгиси эмиш.

Дубайда жиноятчилик даражаси 0% га тенг. Сабаби, кичик ҳато учун ҳам катта жазолар белгиланади.

Дубай полицияси Ламборжини, Феррари, Бентли, Мерседес-Бенз каби қимматбаҳо машиналарда ҳаракатланади.

Шаҳар аҳолисининг 83%и муҳожирлардир.

Бу ерда қарз олиш масаласига жуда жиддий қарашади ва қарзини тўламаган инсонлар шаҳардан ташқарига чиқариб юборилади.
Дубай аҳолиси даромад солиғи тўламайди. Бундан ташқари уй, тиббий ҳизматлар, таълим олиш жараёни учун ҳам давлат пул ажратади.

Дубайда жуфтликлар томонидан ҳиссиётларнинг ошкора намойиш қилиниши мутлақо мумкин эмас. Бу қамоқ жазосигача олиб бориши мумкин. Шу сабабли ҳам шаҳар ичидаги оилавий жуфтликлар ҳам одамлар қаршисида бир-биридан бўса олишлари тугул қўл ушлаб юришга ботина олишмайди.