Seni sevmay qoʻydim

Seni sevmay qoʻydim, rosti gap,
Eslamay ham qoʻydim, koʻp boʻldi.
Garchi quvonchlardan mahrumdir dilim,
Garchi hijron uni boshpana qildi.

Garchi eslamadim seni bir lahza,
Garchi jilovladim tuygʻularimni.
Faqat yuragimda mening ismimsiz,
Yashayverding boqib qaygʻularimni.

Garchi men hammadan seni yashirdim,
Yengib yashayoldim oʻzimni-oʻzim.
Faqat… Men barini inkor etaman.
Faqat… Fosh etadi sevgimni koʻzim.

Garchi takrorlayman, «Sevmayman seni,
Yodlamay ham qoʻydim, gapning rosti shu.»
Faqat… Kulgularim sen bilan ketdi.
Faqat… Qoldi menda muzlagan tuygʻu.