Шифобахш ёғлар- улар ҳақида нималарни биламиз?

“Сочларингиз қалин бўлишини истайсизми, бодом ёғидан суртинг”, “қабзият қийнайди, зайтун ёғидан қабул қилинг”. Бугун бу каби тавсиялар шу қадар кўпки, қай бирига ишонишни ҳам билмайсиз. Хўш, аслида ҳам қай бир ёғ фойдалироқ? Қайсиниси нима учун қўлланилади? Бу мақоламиз шу ҳақда.

Зайтун ёғи
Юрак, томирлар, ошқозон-ичаклар, ўт пуфаги ва жигар хасталикларида фойдали. Мунтазам истеъмол қилинганида жиғилдон қайнашини келтириб чиқариши мумкин. Шу боис ҳафтада бир икки марта фойдаланиш кифоя.

Зайтун ёғи табиий ич сурувчи восита. Эрталаб оч қоринга ичилган бир ош қошиқ зайтун ёғи ичаклар ўтказувчилигини яхшилаб, қабзиятнинг олдини олади. Шу билан бирга ҳотирани яхшилаб, ақлий фаолликни ҳам рағбатлантиради.

Зайтун ёғини кечқурун ётишдан аввал юз терисига суртиб енгил уқаланса, майда ажинлар ёзилади. Англаганингиздек мазкур ёғ ажинларга қарши энг самарали восита. Юздаги косметик воситани тозалашда ҳам пахтага озроқ зайтун ёғидан томизиб, фойдаланиш мумкин.

Хомиладор аёллар қорин терисига тиртиқ тушмаслиги учун илитилган зайтун ёғини қорин терисига енгил суртиб қўйишлари лозим.

Кунжут ёғи
Б гуруҳи витаминлари, кальций, фосфор, ёғ кислоталари, леситин ва сезамол ҳисобига организмнинг ёшга доир ўзгаришларини ижобий ҳал этади. Яъни кексалик аломатлари билан курашади. Эрталаб бир чой қошиқ кунжут ёғини қабул қилиш умумий қувватнинг тикланиши, меъда ва ичаклар, шунингдек, авитаминозда фойда беради.

Сабзавотли салатларга қўшилган кунжут ёғи асабни тинчлантиради. Уйқусизлик, жисмоний зўриқиш, камқонлик, кўз нурининг ҳиралашуви ва ҳотира сусайишида ҳам асқотади.
Кунжут ёғидан юз терисини тозалашда фойдаланиш мумкин. Бунинг учун пахтага озроқ зайтун ёғи томизиб, тери юзаси артилади. Айтганча мазкур усул қуруқ юзлиларга мос келади.

Соч учун кунжут ёғидан тайёрланган ниқобларни ишлатиш мумкин. Тирноқларингиз синувчан бўиб қолдими, ҳар куни уйқуга ётишдан олдин кунжут ёғидан суртиб қўйинг. Бир неча хафтада “ўзига” келади.
Қовоқ ёғи
Меъда ва ичаклар фаолиятини яшилаб, жигар ишини меъёрлаштиради. Тартиб билан қабул қилинганида ичаклардаги тиқинларни ҳайдаб чиқаради, гижжалар билан курашишда ёрдам беради. Паразитлар (гижжа)га қарши даво тариқасида фойдаланилганида сут-қатиқ маҳсулотлари чекланади. Қовоқ ёғини қўллашда ёрлиғида кўрсатилган миқдорига амал қилиш лозим.
Узум данагининг ёғи
Э витаминининг кўплиги билан етакчилик қилади. Узум данагидан тайёрланган ёғнинг атиги бир чой қошиғи Э витаминининг инсон организми учун керак бўлган бир кунлик миқдорини таъминлайди.

Юз ва қўл терисининг қуруқлашишида узум данагининг ёғи яхши натижа беради. Ёғнинг оз миқдордагисини юз ва қўл терисига суртиб, енгил уқалаш кифоя. Тери катаклари керакли озуқага эга бўлади.
Ёнғоқ мойи
Фойдали ёғ кислоталари билан биргаликда биофаол моддаларга мўллиги билан ҳам ажралиб туради. Инсон организми ёнғоқ мойини яхши қабул қилади. Шундай бўлса-да, бир кунда 1 чой қошиқдан ортиғини истеъмол қилиш тавсия этилмайди. Тартиб билан қабул қилинганида иммунитет ва ҳаётий фаолликни оширади, моддалар алмашинуви жараёнини яхшилайди.

Озишни истаганлар учун ёнғоқ энг яхши воситадир.Тана вазнини камайтиришни мақсад қилганлар сабзавотли салатларга ёнғоқ ёғини аралаштиришлари ёки эрталаб нонуштадан ярим соат олдин 1 чой қошиқ мазкур ёғдан қабул қилишлари мумкин.
Авакадо мойи
Юқори калорияли маҳсулот саналса-да, қон таркибини тозалашда ҳизмати беқиёс. Авакадо ёғини сабзавотли егуликларга қўшиб истеъмол қилиш организмга фойда беради. Тановул учун танланган маҳсулотлар кам калорияли бўлишига аҳамият қаратинг. Шунда ўзаро уйғунлик ҳосил бўлади.

Кўз атрофи териси парвариши учун таркибида авакадо ёғи бўлган кремларни танланг. Мазкур восита терини майинлаштириб, майда ажинларни текислайди.
Атиргул мойи
Атиргул баргларидан олинадиган мазкур ёғ шамоллаш, нафас йўли шиллиқ пардалари, бронхитда фойдали саналади. Бош оғриғидан азият чекканлар атиргул мойида намланган латтани ўгриқ берётган сохага қўйиб ётишлари лозим. Мазкур усул уйқусизликда ҳам наф беради.

Атиргул ёғини озроқ илиқ сувга аралаштириб, оғиз чайқалса, тиш оғриғи енгиллашади. Теридаги жароҳатларга суртилса яранинг тез битишини таъминлайди.
Чаканда (облепиха) ёғи
Тиббиётда тери касалликларини даволашда қўлланиладиган чаканда ёғи оғриқ қолдирувчи ва антисептик ҳусусияти билан ҳам қадрланади. Қулоқ, томоқ касалликлари ҳамда соч тўкилишида ҳам фойдаси бисёр.

Ошқозон ярасини даволашда кунига 2-3 марта овқатланишдан олдин чаканда ёғини ичиш тавсия этилади.

Ҳар бир организм ўзига ҳосдир. Шу боис тавсияларни қўллашдан аввал даволовчи шифокорингиз билан маслахатлашинг.