🍛 Taomlar

Kotlet tayyorlash retsepti - usullari, sirlari, mazali goʻshtli qiyma nisbati

2 daqiqa 6.3K marta oʻqildi
Kotlet tayyorlash retsepti - usullari, sirlari, mazali goʻshtli qiyma nisbati
Kotlet tayyorlash usullari juda koʻp. Biroq, ular suvli va mazali chiqishi uchun albatta sinalgan yoʻldan borgan maʼqul. Quyida uyda pishirish oson boʻlgan kotletalar retsepti sizga havola etiladi.

KOTLETA TAYYORLASH UCHUN KERAKLI MASALLIQLAR
Tayyorlash vaqti: 1 soat | Portsiyalar soni: 5
1 kg goʻsht – turli nisbatda qoʻy va mol goʻshtini aralashtirish mumkin;
2 bosh piyoz;
1 ta tuxum;
Kecha pishirilgan 2ta buxanka non (faqat magʻzi kerak boʻladi);
1 choy qoshiq tuz;
1/3 qism maydalangan murch;
Qovurish uchun oʻsimlik yogʻi (5-6 osh qoshiq);
Belab olish uchun un.
PISHIRISH KETMA-KETLIGI

  1. Non magʻzini ushatib, idishga solish, ustidan yarim stakan suv qoʻshib, 5 daqiqaga ivish uchun qoldirish kerak. Non suvni yaxshi shimib olishi kerak.
  2. Piyoz yaxshilab maydalab olinadi.
  3. Goʻsht goʻshtqiymalagichning yirik panjarasi orqali chiqarib olinadi.
  4. Qiymaga non magʻzi (suvi bilan birga), bitta tuxum, maydalangan piyoz qoʻshiladi. Tuz (1 kg goʻsht uchun 1 choy qoshiq) va murch solinadi.
  5. Barcha masalliqlar yaxshilab aralashtiriladi, soʻng qiymani “pishiq” qilib olish kerak boʻladi. Buning uchun suvda namlab olinga qoʻl bilan qiymadan kotlet kattaligidagi boʻlak ajratib olinib, 20 sm uzoqlikdan idishga qaytarib zarb (meʼyorda) bilan otiladi. Shu tariqa 10 daqiqa davom etiladi. Bu usulda tayyorlangan kotletalar qovurish davomida uvalanib ketmaydi va suvli boʻlib pishadi.
  6. Qiyma 10-15 daqiqaga dam olishga qoldiriladi. Bu vaqt davomida goʻsht boʻlakchalari piyoz sharbati, murch va tuzni oʻziga shimib oladi.
  7. Nam qoʻllar bilan qiymadan kotlet shakllantiriladi. U haddan ortiq qalin boʻlmasligi kerak, aks holda ichi pishib ulgurmay, usti kuya boshlaydi. 1,5 sm qalinlik eng yaxshi tanlov boʻladi. Tayyor boʻlgan qiyma boʻlakchalari unga belab olinadi.
  8. Kotletalar yaxshi qizigan tovada qovuriladi. Chunki bu vaqtda yuqori harorat tufayli qiyma yuzasida qobiq hosil boʻladi va u ichki suyuqlikni saqlab qoladi. Agar tova yaxshi qizdirilmasa, kotletlar tovaga yopishib qolishi va u shu tufayli uvalanib ketishi mumkin.
  9. Tovaning qopqogʻini yopmagan holda kotletaning har bir tomoni 3 daqiqadan qovurib olinadi. Soʻng, olov biroz pasaytiriladi va har bir tomoni yana 3 daqiqadan qovuriladi. Shundan soʻng, yakuniy tayyor boʻlguncha oʻrta olovda tovaning qopqogʻini yopgan holda pishirishda davom etiladi.
  10. Dasturxonga qovurilgan kartoshka va tuzlamalar bilan tortiq qilinadi. Goʻshtli taomlar uchun moʻljallangan souslar ham mos keladi. Yoqimli ishtaha!
KOTLETA PISHIRISHNING BAʼZI SIRLARI
Kotletada asosiy rol non magʻziga toʻgʻri keladi. Agar non kam solinsa, goʻsht qattiq va bemaza boʻlib chiqadi. Shuningdek, non yangi boʻlmasligi ham eʼtiborga olinishi kerak. Ideal variantda u tezda ushaladigan boʻlishi talab etiladi. Yangi non esa choʻziluvchan boʻladi.

Taom suvli boʻlib chiqishi uchun goʻshtni oʻzingiz qiymalagichdan chiqarganingiz maʼqul. Bunda goʻshtning bir qismi yogʻli boʻlishi muhim. Agar lahm boʻlsa, bir boʻlak charvi qoʻshib yuborish ham mumkin. Yog’ pishirish davomida erib, goʻshtga yumshoqlik beradi.

Piyozni qiymaga aynan mayda qilib toʻgʻrab solish kerak, koʻpchilik bunda uni goʻsht bilan birga qiymalagichdan chiqarib yuboradi. Bu holda u oʻz aromati va suvliligini yoʻqotadi.

Qiyma qovurish davomida boʻlaklanib ketmasligi uchun uni yaxshilab urib olish muhim bosqich sanaladi. Uni cheklab oʻtish tavisya etilmaydi.
Telegram

Izohlar

0
Fikringizni qoldiring
Izohlar tekshiruvdan soʻng chiqadi.

Hozircha izoh yoʻq — birinchi boʻlib fikr bildiring!